Shillong, Naitung 15: Ka Geological Survey of India (GSI) North Eastern Region (NER) hynne ka sngi thohdieng, kala pynlong ia ka field training programme (ai jinghikai shabar ka Ophis) ia ki samla pule ka St.Anthony’s College ban tohkit bad wad jingtip kiba bniah halor ka jinglong jingman jong ka Umiam Hydro Electric Project (HEP).
Ia kane ka jingai jinghikai la pynlong kum shibynta jong ka jingrakhe ia ka Azadi Ka Amrit Mohatsav, kaba dei ka jingrakhe ia ka jingdap 75 snem ka jingioh laitluid ka Ri.
Kum shibynta jong kane ka jingrakhe, ka GSI-NER kala pynlong ia kiba bun ki prokram na ka bynta ki khynnah skul bad ki College jong ka Nongbah Shillong hynne ka sngi.
Ia kane ka prokram la plie da u G.K.Kesari uba dei u ADG& HoD, NER ha ka jingiadonlang u Prof Devesh Walia, HoD ka Geology, NEHU, Shillong.
Haduh 75 tylli ki balloon la pynher ha kane ka sngi ban rah ia ka khubor jong ka Azadi ka Amrit Mohatsav hashuwa ka field training programme bad ka jingleit ialam kai ia ki khynnah skul sha ka Museum bad Labotatory nalor ka jingiakop kyntip.
Kine ki Heh Ophisar kila pyllait paidbah ruh ia kawei ka Coffee table book halor ka Geo-Tourism Hotspot jong ka thain Shatei Lam Mihngi ka Ri.
Kumban shu kdew hangne, ka GSI-NER kala pynlong ia kane ka jingrakhe haduh 75 taiew lynter kaba sdang naduh ka 12 tarik Lber, 2021 bad ha kine ki taiew bala lah, kala pynlong ia ki prokram bapher bapher kynthup ia ka jingsynniang snam, ka jingiathung dieng, bad ki jingai jinghikai halor ka Geology science.
