Shillong, Nailar 28: Ka Khun Hynniewtrep National Awakening Movement (KHNAM) hynne ka sngi kala leit buh daka dorkhas sha u chief secretary (CS) ka jylla ban dawa ban kynthup lang iaki trai jylla hapoh ka Expert Committee bala thaw daka Sorkar, ka ban bishar biang iaka bhah thungkam lane ka Reservation Policy.
Lyngba ka dorkhas ka KHNAM kala pynsngew ba ka jingdon lang ki trai jylla hapoh ka Expert Committee kan pynjanai shuh shuh iaka jingiathir halor ka jingthmu ban bishar biang iaka Reservation Policy.
Nalor kane ka KHNAM kala dawa ruh ban pynkylla iaka jingthmu jong ka Expert Committee haba iadei bad ka phang pdeng ban bishar biang iaka Policy.
“Ka jingsdang jong ka Expert Committee kadei ban long shai, kata ban bishar iaki jingai jingmut jong ki sengsain pyrthei kumba la shim rai haka jingialang ba 31 tarik Jymmang 2023” la ong ka dorkhas.
Ka KHNAM kala ai jingmut baka Expert Committee kam donkam ban pynlut kai iaka por bad pisa ban leit sha kiwei ki jaka ban sngap iaka sur u paidbah haba iadei bad ka jingbishar biang iaka Reservation Policy hynrei ka kyntu ruh ba ka Committee kadei ban ailad ia baroh ban ai jingmut kumno ban iaid shakhmat ban bishar biang iaka Policy.
