Guwahati, Nailar 13 : Uwei u Pulit constable ula iap ha ka sngi saitjain katba u dang iakilan met bad ialeh drill ban pynkhreh ia ka jingrakhe Independence Day ha Guwahati.
Une u Pulit langrut u kyrteng u Kukil Dutta uba dei na Lakhimpur bad ba trei hapoh ka Assam Police Radio Organisation (APRO) ha Tezpur.
Kat kum ka jingiathuh ki Pulit, u Dutta ula sngew pher ha ka met bad kyllon ha ka por leh drill ha ka thain Khanapara. Ia une u Pulit la pynkit mar mar sha Hospital hynrei ki doktor kila pynbna ba ula iap lypa shuwa ban poi ha hospital.
U IGP Law and Order ka Assam Prasanta Bhuyan ula ong “Ula kem pang bad iap noh hadien. Ngin dang ban ioh ia ka kaiphod post mortem. Hashien ba ngi ioh, ngin sa lah ban batai ia ki jingpang ba don ka met jong u”.
Ia ka metiap une u Pulit la phah noh shala shnong ban pyndep ia ka lehniam leh rukom ba khatduh.
