Shillong, Nailar 11 : Ka Sorkar Jylla ha ka sngi Thohdieng, kala ai jingmynjur ia ka Mid-Career sponsored courses ne ka jingleit pule pyntbit bala bei tyngka da ka Sorkar, na ka bynta ki Ophisar ba bat ia ka kyrdan kaba heh, khnang ba kin kham shemphang bad ban lah shakri kham bha shuh shuh ia ka Jylla.
Ka Sorkar kala shim ia kane ka rai ha ka jingialang jong ka kynhun Myntri ba la pyniaid da u Myntri Rangbah ka Jylla Conrad K Sangma.
“Ka kynhun Myntri kala iakren ia ka mid-career sponsored courses na ka bynta ki Heh Ophisar jong ka All India Services, Meghalaya Civil Service, Meghalaya Police Servce, Forest and Finance Services ba kin nang pynproh jabieng bad ban pynjanai ia ka jinglah shakri ki Ophisar jong ka Jylla, kaba long kongsan ha ka jingiatreikam hapdeng ki bor synshar sain pyrthei bad ki paidbah” ong u Myntri bad Nongaiktien ka Sorkar Bah Paul Lyngdoh haba iakren bad ki nongthoh khubpr hadien ka jingialang.
U Bah Paul u iathuh ba ha ka jingiakren, ka Sorkar kala rai ruh ban pynshlur bad ai ia ki jingmyntoi ia ki Ophisar ba kin bteng ia ka jingleit pule pyntbit ha ki University bapher bapher, kiba ai ia ki degree bad diploma courses kiba kham heh kyrdan bad ia kine yn shim da ki Ophisar jong ngi khlem da pyndhoh pat ia ka kam, kaba mut ba kin ym shim satia ia kano kano ka shuti ha ka por ba ki dang don ha ka jinghikai pyntbit.
“Kan ym don satia ka shuti pule, kin ioh ia ka por ban pule ia kine ki courses ha ki kut taiew lane hadien ba kut ka por treikam ki Ophis” ula ong.
U Bah Paul u iathuh ba ia kine ki courses la dei ban ithuh bad ki kynthup ia ka MBA bala tyrwa da ka IIM Shillong, Master in Public Policies kaba don ka online courses bala tyrwa da ka OP Jindal Global University, Professional Certificate Programmes bad Data Science bad AI kaba dei hi ka online courses bala tyrwa da ka Indian Institute of Informatn Technology, Bangalore lane University of Merriland, Ph.D Programme bala tyrwa da ka IIM Shillong bad ka part time PH.d bala tyra da ka Jindal Global Law School bad IIT, Executive fellow in Management lane Ph.D in Management Programmes bala tyrwa da ka IIM.
Kum ka jingai jingmyntoi ia kine ki Ophisar, u Bah Paul ula ong ba ka Sorkar Jylla kala mynjur ia ka jingtyrwa ban bei ia ka bai pule (tution fees) ia ki programme haduh T. 15 lak ia kaba la buh ruh ia ki kyndon kum ka nuksa, ki Ophis ki dei ban dang don sa 7 snem ha ka jingshakri, ki dei ban shim ia kane ka jingpule kum ka part time khlem kano kano ka shuti pule kot bad manla u snem haduh 3 ngut ki Ophis kin ioh leit pule bad yn bei tyngka da ka Sorkar.
U pyntip ba ka Sorkar kan sa thaw ruh ia ka Committee kaba khlieh da u Chief Secretary, ka ban sa bishar bad ai jingmynjur ia ki application jong kine ki Ophisar.
Ha kajuh ka por, ka Kynhun Myntri kala mynjur ruh ia ka draft jong ka jingkren lamphrang ha ka sngi rakhe ia ka Sngi Laitluid ka Ri, kaba kdew ia shibun ki kam ba ka Sorkar kala leh naduh ba ka shimti ia u lakam ban synshar.
Also read: Rai ka Sorkar ban buh da u pud ia ka jingleit bar-Ri u CM, ki Myntri Sorkar bad ki Ophisar
