Shillong, Nailar 11 : U Myntri Rangbah ka Jylla Conrad K Sangma, hynne ka sngi Thohdieng, ula pyllait paidbah ia ka Chief Minister’s Solar Mission bad pynbna ba ka Sorkar kan kynshew haduh T. 100 klur shisnem ban pyntreikam ia kane ka Mission hapoh ka Jylla.
U Myntri Rangbah ula pyllait paidbah ia ka CM Solar Mission ha ka jingialang bala pynlong ha State Convention Centre, Shillong, ha ka jingiadon ryngkat u Myntri ka tnad Bording Abu Taher Mondal bad u Chairman ka MNREDA Rupert Momin.
Haba kren ha ka jingialang, u Myntri Rangbah ula ong “Ka CM Solar Mission kan wanrah iaki jingpynkylla ha ka rukom kynshew pisa ban kyrshan ia ka mission. Da ka jingkut jingmut ban pynkhlain ia ka jingpynmih bording na kiwei ki tyllong bym pynjot mariang (green energy), ka Sorkar Jylla kan ai ia ka subsidy kaba biang bha. Ki Unit kiba heh kin ioh haduh 70% ka subsidy bad kiba rit kin ioh 50% ka subsidy. Ban pynsting ia ka jinglut jingsep, ka Mission kan iarap ruh ban plie lynti lyngba ki Bank, iarap ban pynioh haduh 40% ka bailut baisep”.
Ula pyntip ba ka Sorkar Meghalaya kala buh ia ka mang pisa ban kynshew haduh T. 100 klur shisnem na ka bynta ka Solar Mission. Ula pyntip ba ki nongioh jingmyntoi kin donkam ban siew ia ka down payment ba tang 10% ban ioh pyntreikam ia kane ka mission.
Haba niew ia kane ka jingpyllait paidbah ia ka CM Solar Mission kum ka sienjam ba shakhmat ha ka lynti iaid jong ka Sorkar ban tehlakam ia ka jingkyrduh bording ha Jylla, ula ong “Ka lah ban nym ratdyngkhong lut ia baroh ki jingeh, hynrei ngi lah ban iohi ba haduh 30-40 % ki longiing kin ioh bording lyngba ki solar unit”.
U Myntri Rangbah ula ong ba ki jaka pule bad ki jaka treikam kiba heh kin ioh jingmyntoi bha na kane ka skhim.
Kum shibynta jong ka skhim, ki Unit ba 40 KVA kin ioh ia ka subsidy ba 50%, ka ban pynduna bha ia ka jinglut jingsep.
“Ngi sngew sarong ruh ban pynbna ia ka jingpynkha ia ka LED Assembling Unit ha kylleng ki jaka ka Jylla jong ngi. Kine ki jaka pynmih LED ym tang ba kin aikam iajam ia ki samla hynrei kan pynlong ruh ia ka Jylla ba kan shaniah halade ha kane ka bynta”. Ula ong.
Nalor kane, u iathuh ba kala don ruh ka jingiakren bad ki kompani shna battery ban lah pynkha ia ka karkhana pynmih battery bad ba maramot ia ki battery hapoh Meghalaya. U ong ba ka jingthmu jong kane hi ka long ban tehlakam ia ki jingeh haba iadei bad ka jingdonkam ba bujli ia ki battery bad kiwei kiwei.
Ki mat ba kongsan jong ka CM Solar Mission ki kynthup :
– Subsidized Solar Hybrid Inverters bad Solar Water Heaters ia baroh ki Nongshongshnong.
– Ka jingai ia ki solar inverter naduh 500 VA haduh 40 kVA, bala shna ban pyndap ia ka jingdonkam bording jong ki Longiing longsem, ki jaka treikam bad ki dukan.
– Ban wanrah lang ia ka solar system bad ka main grid lyngba ka net metering, ka ban pynlong ia ki Longiing kum ki tyllong pynmih boring bad pynduna ia ka jingsiew bai bording.
– Subsidized solar water heaters ban pynioh ia ka umkhluit khlem da shaniah ha ka bording elektrik bad kiwei kiwei.
Haba ai jingkren, u Myntri ka Tnad Bording AT Mondal ula kren bad iaroh ia u Myntri Rangbah ka Jylla halor ki sienjam ba ula shim ki ban sa ai jingmyntoi bha ia ki paidbah ka Jylla. Ula kren ruh halor ki jingeh ba iadei bad ka bording elektrik namar ka Jylla Meghalaya ka dang shaniah tylli ha ki hydro project ban pynmih bording elektrik.
Kiwei pat kiba la kren ha ka jingialang ki kynthup ia u Chairman ka MNREDA Rupert Momin bad u Secretary ka Tnad Bording Joram Beda.
Pule lang ia kane: Rai ka Sorkar ban buh da u pud ia ka jingleit bar-Ri u CM, ki Myntri Sorkar bad ki Ophisar
