Guwahati, Nailar 10 : Hadien ka khlam Covid-19, sa ka khlam pangkhmat bala tip kum ka viral conjunctivitis, kala lynshop mynta ha ki katto katne ki jaka jong ka Kamrup District ka Assam.
U District Joint Director ka Health Service ka Kamrup, Dr Mohitosha Banerjee ha ka sngi Balang ba kane kam dei ka kam kaba hap sheptieng hynrei donkam ban shim ia ki lad jingiada lada don kiba iohpang khmat lane dei ban pynshong khop bad set slung ia ki hapoh Iing.
La bthah ruh ba lada don kiba pang, ki dei ban pan jingmut na ki doktor speclist bad ban shim ia ka lynti ban lehkhuid khnang ba kin ioh koit kloi.
“Ngi la ioh khubor halor ka jingsaphriang ka jingiabit ia kane ka jingpang na baroh ki jaka ka Kamrup District bad nga kyntuia baroh ki jaka sumar ka District ba kin leh ia kaba donkam lada don ki nongpang kiba wan shim jingsumar” ong u Dr Banerjee.
Ha kajuh ka por, ka khubor ka iathuh ba bun ki khynnah skul jong ki skul Lower Primary, High School, Secondary School bad College nalor ki Nonghikai bad ki Nongtrei kila iabit ia kane ka jingpang khmat. Hynrei u SD&MO ka Boko BPHC ula kyntait ia kane bad pyntip ba ym pat don satia haduh mynta wat uwei u nongpang ha Boko Block PHC.
U Pradip Barman, Headmaster ka Boko High School ula pyntip ba bun ki khynnah skul ha klas bapher bapher, kila ioh ia kane ka jingpang haba pyntip “Nga la bthah ia ki khynnah skul bad kumjuh ruh ki Nongtrei ba lada ki don jingpang khmat ba kin shongkhop noh ha Iing bad ban leit iakynduh ia ki doktor ban ioh dawai”.
U Swadhin Boro, Head teacher ka Bhogdabari Lower Primary School ula iathuh ba ula iohi ia katto katne ki khynnah skul bad ki nonghikai kila ioh ia kane ka jingpang khmat. Ula bthah ia ki khynnah skul bad nonghikai ba lada ki pang khmat ba kin shongkhop noh ha iing bad leit shim dawai na ki doktor specialist.
Kumjuh ruh u Principal ka Jawaharlal Nehru College, Boko Dr. Tapan Dutta u iathuh ba ula lap hi dalade ba uwei u nonghikai bad uwei u nongtrei ka college ula ioh ia kane ka jingpang khmat. “Nga la bthah ia baroh ki nonghikai, ki nongtrei bad ki khynnah klas ba lada ki ioh ia kane ka jingpang ba kin set slun gialade hala iing bad leit shim dawai na ki doktor” ong u Dutta.
Pule ruh: Rai ka MNF ban kyrshan ia ka No-Confidence Motion pyrshah ia ka Sorkar NDA ha Lok Sabha
