Nongpoh, Nailar 09: Ka Raid Bhoilasa Social & Cultural Development Committee, kala pynpaw ia ka jingpyrshah kaba jur halor ka jingthung Lyngdoh Raid jubor ka Ophis u Syiem ka Hima Mylliem ha Raid Bhoilasa khlem da bishar ia u briew.
Ka RBSCDC kala leit ujor pyrshah ia ka Hima Mylliem sha u Deputy Chief Executive Member (DyCEM) ka KHADC Bah Pynshngain N Syiem haba kyntu ba un tuklar lem bad ban pynsangeh ia kane ka kam jong ka Hima Mylliem.
Kat kumkane ka shithi, u Project Director ka RBSCDS ula ong ba ka Committee ka pyrshah jur ia ka jingthmu thung Lyngdoh Raid da u briew uba ka Raid Bhoilasa kam pdiang. U ong ba ka jingbym pdiang ka dei halor ka nongrim ba kynnoh ba une u briew um long uba bit ban shah jied kum u Longsan namar ka jingbym tip ia ka jinglong kyntang ka Dorbar Raid bad u dei ruh uba ki Nongshong Dorbar kim ithuh satia.
Ka Committee kala pyntip ba kumba ju long baroh shikatta hapoh ka Raid Bhoilasa, ka Durbar jong ka Raid ka dei kaba ju phah ne tyrwa ia ka kyrteng jong uno uno u Rangbah bala jied da ka Kur Lyngdoh kaba dei hok ban shim ia ka kyrdan Longsan hapoh ka Raid.
Hynrei la ong ba ha kane ka kynti, kam shym la don satia kano kano ka jingpyntip paidbah na ka liang ka Ophis u Syiem ka Raid kumba ju leh hashuwa ban phah ia ka kyrteng ban shimti ia ka kam Longsan. La ong ba ka jingtip ba ki ioh ka long tang ka jingaiktien na ka liang u Acting Syiem ba um lah shuh ban treikam bala bala sloit noh ia ka kam jong u.
Kane ka Committee ka kam ruh ba wat ka Kur Lyngdoh kam pdiang satia ia une u rangbah ban shimti kum u Nongmihkhmat jong ka Durbar Raid naba ka Kur kam pat ai jingmynjur ia uno uno ruh ban mihkhmat ia ki sha ka Durbar Raid. La iathuh ba ka Kur ka dang ap ia ka Ophis u Syiem ba kan wan pynlong ia ka elekshon hapoh ka Kur kat kum ka jingiakut ha ka jingiakynduh hapdeng ka Kur bad ka Ophis u Syiem ka Hima Mylliem.
Ka RBSCDC ka kyrpad ia ka KHADC ba kan bishar hok bad shimkhia lem ia kane ka kam khnang ban lah weng ia u lyoh jong ka jingartatien na ka bynta ka lawei ki khun samla ka Raid.
Pule lang ia kane: Manipur : Kynthoh tyngeh ka Supreme Court ba pheil ka Tnad Pulit haba bishar ia ki kaiphod halor ki ejahar
Peit lang ia kane
