Nongstoin, Nailar 08 : Ka FKJGP-Lai Lyngdoh Area, kala pynrem jur ia ki riew runar kiba leit ban thombor ia ka kompani ba shna ia ka surok Nongstoin-Wahkaji, kiba la wiang ding ia kawei ka trok dumper bad ka kor khleh rong ha ka Shnong Mawthyngkper, West Khasi Hills.
U President ka FKJGP-Lai Lyngdoh Bah Nestor Nongkseh ula pynpaw ba kane ka jingleh riewkhlaw ka dei ka bym lah satia ban pdiang ha ka thain namar kane ka kompani ka dei kaba pyntrei ia ka surok kaba pyniasoh ia ka Nongstoin sha Wahkaji.
“Kane ka jingleh riewkhlaw jong kine ki riewshimkabu ka lah ban wanrah ia ka jingthut ha ka jingpyntrei ia ka surok bad ka jingduhnong kan long ia ngi ki paidbah ba shong ba sah ha ka District” ula ong.
U Bah Nestor ula kyntu ia ki bor ka Ain ban wad ia kine ki briew kiba leh ia kane ka kam riewkhlaw khnang ban lap ki dei kiei bad kaei ka daw kaba pynlong ia ki ban leh ia kum kane ka kam.
Ha kajuh ka por, ka Seng ka kyntu ruh ia ki Nongshongshnong ba lada ki lap ia kano kano ka jingduna jong kane ka kompani ba kin sngewbha ban leit mih iakren bad iapunbeit khnang baka kam shna surok kan iaid beit iaid ryntih.
Pule lang ia kane: Thombor ki runar ia ka kompani ba shna surok Nongstoin-Wahkaji, shah thang kawei ka dumper
