Shilong Nailar 04: Ka Khun Hynniewtrep National Awakening Movement (KHNAM) kala pynrem jur iaka jingshim sting ka sorkar jylla, ha kaba iadei bad ka jingkhlad noh jong ki 5 ngut ki Khasi ha ka jingjia ha Mukroh namar haduh mynta kam shym la phah ia kano kano ka jingthoh sha ka S.K Pukan (Retd) Commission of Inquiry kaba wad bniah iaka jingjia ha Mukroh.
“Ka S.K Pukan (Retd) Commission of Inquiry kaba la thung kyrpang ban wad bniah halor ka jingjia ha Mukroh, ha kaba 5 ngut ki Khasi bad 1 u Forest Guard ka Assam ki la khlad noh ha ka jingiakynad ha Mukroh. Ngi pynpaw ka jingsngewsih bad ngi pynrem ruh ia ka Sorkar Meghalaya, haba ngi ioh ia ka khubor ba ka shim sting ia kane ka kam” ong u Bah Thomas Passah, Working President ka KHNAM ha ka kyrwoh khubor.
U Bah Passah ula ong, ba katkum ka jingbatai jong kane ka Commission kala ong ba wat hadien ba kala dep khot ia ka Hearing ha ki bnai ba la dep ha Assam, kam pat don kano kano ka jingai jingthoh na ka liang ka sorkar Meghalaya haduh kine ki sngi bad ki jingthoh kiba ka Commission kala ioh pdiang la long tang naka liang ka Sorkar Assam, ki bor District bad Pulit ka Assam bad na ki riew paidbah na Assam.
“Kane ka Commission kan pynlong biang ia ka Hearing ha ka 7 tarik mynta u bnai ha Assam House Shillong bad katkum ka Notis ka Commission kala bthah ruh ia ka Sorkar Meghalaya lyngba ka Sorkar Assam ban wanrah bad pynbiang ia ka kaiphod, ki kot ki sla bad ki sakhisatar ha kaba iadei bad katei ka jingjia” la iathuh u Nongialam ka KHNAM.
Ula iathuh ba ka Commission kala kyntu ruh ia baroh kiba thmu ban ai jingtip/jingthoh ba kidei ba leh ia kaba donkam khnang ba ka jingbishar kan long kaba bniah.
“Ngi sngew ba kadei ka kamram jong ka sorkar ban iarap lem ia ki Khasi ki jong ngi kiba na ka shnong Mukroh kiba lah ban ai jingtip lane ban long ki sakhi ha katei ka jingjia, namar ioh tang namar ka jingduk jingkyrduh lane ka jingbym tip kan pyndkut ban ioh iaka jingbishar kaba hok” ong u Bah Passah.
Une u nongialam ka KHNAM ula ong ruh, ba la iohi ia ka jingiohbor bad jingleh shlur jong ki Karbi ha ki thaiñ khappud ha kaba kila pynieng ia ka khyrdop lum khajana ha Khanduli bad kila byrngem ia ki Pnar ba kin ym bit ban thaw kynhun lane seng, haba ia lade ki la thaw da ka seng lehnoh kumba la paw lyngba ki lad pathai khubor.
“Ka jingshah bthah jubor jong ki 5 ngut ki mynsiem ha Mukroh ka dang shu jia hynrei ka long kaba sngewsih ban iohi pat ia ka jingkloi ban pjah na ka liang ka Sorkar bad baroh kiba la ia pynpaw ia ka jingpynrem bad jingbitar halor kane ka kam. Lada ka Sorkar Jylla kan dang sngap jar ha kane ka jingkhot ka Commission ha ka 7 tarik mynta u bnai, kan long kaba sngewsih ia ngi lang baroh bad kaba ai mynsiem pat ia ki Karbi ba kin leh katba mon bad pyniap ia kat kiba ki kwah” la pynkut u Bah Passah.
