Shillong, Nailar 04 : U Myntri Rangbah ka Jylla Conrad K Sangma ha ka sngi Thohdieng, ula ai ka jingkular ban pynbeit noh mynta ka taiew ia ka kam pynieng khyrdop beain ka Karbi Anglong Autonomous Council (KACC) ha shnong Khanduli, West Jaintia Hills District.
Haba iakren bad ki nongthoh khubor, ula pyntip ba ula dep iakren ia kane ka kam bad u Myntri Rangbah ka Assam Himanta Biswa Sarma bad u kyrmen skhem ban lah pynbeit noh kham kloi kat kaba lah ia kane ka kam.
U Conrad ula ong ba ula ioh ia ka jingtip halor kane ka khyrdop na ki nongialam sain pyrthei ka thain bad ki paidbah ka Khanduki. “Nga la dep iakren ia kane ka kam bad u CM ka Assam bad ga kyrmen ban gin sa lah ban pynbeit noh hapoh kane ka taiew hi” ula ong.
Haba kylli, u Myntri Rangbah ula ong “Ka don ka jingeh khyndiat ha kane ka kam hynrei nga la ioh ia ka jingkular na u CM ka Assam ba un sa pynbeit ia kane ka kam hynrei to ngin ia ap ia kaei kaba mih bad nga ngeit skhem ba ngin lah pynbeit noh ia ka”.
Haba sdang jonng ka taiew, ka kynhun jongka Jaintia Students Union (JSM) kila hiar sha Khanduli da ka jingthmu ban pynpra ia ka khyrdop lum khajna jong ka KAAC ha kane ka Shnong.
Hynrei ia ki Nongialam bad ki dkhot ka JSM la khang noh da ki bor pyniaid ka West Jaintia Hillsbad ki Pulit, kiba la pyntip ruh ba u CM ka Jylla bad Assam kin sa hiar sha Khanduli ha ka 3 tarik Nailar. Hynrei kane ka jinghiar jurip kam shym la urlong satia namar ki katto katne ki daw.
U Conrad ula pyntip ba un sa pyrshang ha ryngkat u CM ka Assam ban hiar iuhkjat sha kane ka shnong hadien ka 15 tarik u Nailar, 2023.
