Shillong, Nailar 03 : Ka kynhun ki Heh ka Tnad Forest bad ka Khasi Students Union (KSU) kila hiar jurip hynne ka sngi Palei ha Mahadev Khola, Upper Shillong ban ioh jingkhein ia ka jingdon ki briew kiba sah beain ha kane ka jaka sorkar.
Kane ka jingjurip kala wan jia hadien ka jingleit ujor ka KSU-Laban Circle ia u Principal CCF & HOFF ka tnat Forest & Environment ka sorkar jylla R. S. Gill ha kane hi ka step, ban pynbud ia ka jingujor bala ai ha u Divisional Forest Officer ka East Khasi Hills, kaba long pyrshah ia ki briew ba sah beain ha Mahadev Khola.
Ka KSU kala kynnoh ba ka Tnad Forest kala ai jaka ha u snem 1923 sha ki riew ngeit Hindu ba kin tei ia ka Hindu Temple ha Mahadev Khola na ka bynta ka jingleh niam ym ban shong ban sah ki briew.
Ka KSU kala kam ba ki don haduh 30-40 tylli ki Iing bad bun tylli ki dukan jong ki bar jylla kila don ha kane ka jaka khlem kino kino ki kot ki sla kiba biang. Halor kane ka nongrim, ka Tnad Forest bad ka KSU kila pynlong ia ka jingiajurip lang ia kane ka jaka.
Dang ha kine ki khyndiat taiew (24 Naitung), ka kynhun ki runar kila leit pynkulmar ha Mahadev Khola kaba la sdang da ka jingleit pan shah ia ka jingdih Amul Cool na kawei ka dukan ba shong kawei ka Longkmie. Kine ki briew kila thombor ia kane ka dukan bad lute ruh na ka trai.
Halor kane ka jingjia, ki Pulit kila kem ia 3 ngut ki briew bad arngut ki Khynnah rit kiba donbynta ha kane ka kam bymman.
U Myntri Rangbah ka Jylla Conrad K Sangma bad wat ki Pulit ka District, kila pyntip ba kane ka jingjia ha Mahadev Khola ka dei ka kam jong ki riew runar bad kam don jingiadei eiei ruh em bad ka jingsngew iapher niam ne Jaidbynriew.
