Shillong, Nailar 02: Ki sengsain pyrthei, ki sengbhalang ne ki kmie ki kpa kim ju phah iala ki dkhot ne iala ki khun ban leh ia kino kino ki kam beain ne kiba pyrshah iaka imlang sahlang.
Ia kane la ong da u myntri sorkar u bah A.L Hek u badei ruh u nongialam ka Bharatiya Janata Party (BJP) Meghalaya halor ka jingkam ka tnat Pulit ba ki briew kiba thaw jingkulmar ha Tura West Garo Hills kidei kiba dkhot jong ki katto katne ki sengsain pyrthei hapoh ka jylla.
U bah Hek ula ong ba kadei ka kamram jong ka sorkar bad ka tnat Pulit naduh u DGP, SP bad DC ban peit thuh iaki briew kiba thmu ban wanrah jingkulmar bad haka juh ka por ban tem ia kino kino ki kynja jingkulmar.
Ula ong “Ka long kaba donkam ban don ka jingtohkit hadien ba mih kano kano ka jingkulmar bad lap iaka jingshisha bad dei ruh ban shaniah haki bor district bad ki Pulit ban pynlong ka jingtohkit ban lap iaka jingshisha”.
Haba kylli balei ki bor Pulit kila kam ba kiba thaw jingkulmar kidei ki dkhot jong ki sengsain pyrthei u bah Hek ula ong “Katba ka jingtohkit ka dang iaid ngim pat lah ban kren eiei halor kata. Ngi dei ban ap shwa iaka kaiphod naki bor district”.
U bah Hek ula ong ba ia kum kine ki jingjia thaw jingkulmar ym dei ban shu kynnoh iaki sengsain pyrthei ne ia kino kino ki seng namar kum kine ki jingthaw jingkulmar la shem ha baroh kawei ka ri.
“Iaka jingkulmar ha Tura ym lah ban kynnoh iaki sengsain pyrthei ne ia kino kino ki seng namar kiba pynkulmar ki leh daka jingkitkhlieh hala de namar kino kino ki sengsain pyrthei kim ju phah iaki dkhot ban leh iaki kam beain ne kiba pyrshah iaka imlang sahlang” ula ong.
