Guwahati, July 31 : Ka kynhun ki Pulit Special Task Force (STF) ka Assam, kila pynlong ia ka jingkhynra ha ki district khappud ka Jylla Tripura bad ioh kem ia 8 ngut ki briew kiba ju pynrung tuh ia ki jaidbynriew Rohingya na Bangladesh sha India.
Ia kine ki briew la kem halor ka STF case No. 01/2023 U/S 120(B)/ 121A/ 153A(1)(b)420/ 468/471 IPC R/W Section 12(1)(a)/12(1A) (a)(b)/12(2) of the Passport Act.
Ia kane ka jingkhynra la pynlong da ka kynhun ki Pulit bala khlieh da ki kyrdan ASP/DySP ha kylleng ki District ba don ha khappud jong ka Tripura.
“Ha ka jingkhynra, ngi la ioh bat haduh 8 ngut ki briew kiba donkti ban pynrung tuh ia ki Rohingya Muslim sha India da kaba pyndonkam ia ki ID thok bad kiwei ki kot ki sla ba shu shna thok ban pyni ba ki dei ki nong India” ong ka kyrwoh na ki Pulit ka Assam.
Kine ki 8 ngut ki dei kiba la tip kyrteng da u Uttam Paul, Kajal Sarkar, Sagar Sarkar, Pervez Hussain ba khot sin u Abdul Hussain, Md. Shahadat ba khot sin u Sahadat SK, Shib Sankar Ghosh ba khot sin u Boto, Kartik Nama, bad u Bijoy Barua.
Ki Pulit kila ong ruh ba kine ki briew ki dei ruh kiba iarap ban kyntiew ia ki Rohingya ha ki rel ba leit sha Delhi na Kumarghat Railway Station (Tripura). Ki ju iarap ruh ban kyntiew ia ki Rohingya ba kin leit sha Kolkata, Delhi, Hyderabad Bangalore na Dharmanagar, Kumarghat kiba don ha Tripura lem bad ka Badarpur (Assam da kaba pyndonkam ia ki ID thok bad kiwei ki kot ki sla ba shu thok.
Ka jingtohkit mynta ka dang iaid shakhmat ban ioh kem ia kiwei kiwei ki briew kiba donkti ha kum kane ka kam.
