Nongpoh, Naitung 26: Ka Ri Bhoi Youth Organization (RBYO), sengkmie ha ka sngi Balang, kala khang tala ia 3 tylli ki karkhana otdieng bala kynnoh pyniaid beain da ki bar Jylla ha ka thain Umling bad beh krad ruh ia ki nongbylla bar jylla ki bym don ia ki kot ki sla ba biang.
Kane ka seng bala ialam da u President Baiateilang Lapang, kala leit jurip ia ki karkhana otdieng kynthup ruh ia ki furniture ban khmih ia ki kot ki sla kynthup naduh ki jingioh jingbit na ka Tnad Forest, ka KHADC bad kiwei kiwei.
Haba iakren bad ki nongthoh khubor, u Baiateilang ula iathuh ba kane ka sienjam bala shim da ka RBYO ka dei halor ka jingioh khubor ba kine ki karkhana kila treikam beain khlem ki kot ki sla nalor ka jingbuh ia ki nongbylla bar jylla ki bym don ia ki licence.
U pyntip ba ha kane ka jingleit jurip, ka seng kala ioh ruh ia ka jingiatreilang bad ki bor ka Infiltration ban beh ia kine ki bar jylla kiba treikam beain.
“Ngi la khang khyrdep ia lai tylli ki karkhana otdieng jong ki bar jylla ki bym don satia ia ki kot ki sla” ula ong.
Ha kajuh ka por, une u Nongialam ka RBYO ula maham ia ki contractor kiba ju wanrah ia ki nongbylla bar jylla khlem da pynbiang ia ki kot ki sla kum ka labour licence bad kiwei kiwei.
