Tura, Naitung 25: Ki Pulit ka West Garo Hills kila lap ba dei ki Nongialam ka Trinamool Congress bad ka BJP kiba don ha lyndet ban kynshoit ia ki paidbah ba kin thombor ia ka jingialang hapdeng u Myntri Rangbah ka Jylla Conrad K Sangma bad ki Nongialam ka ACHIK ha CMO Tura.
Ki Pulit kila kem ruh haduh 18 ngut ki briew kynthup ia 2 ngut ki Nongialam ka BJP Mahila Morcha katba 2 ngut ki dei ki Nongialam ka Trinamool Congress. Kine ki dei kiba kynshoit ia ki paidbah ban thaw ia ka jingkulmar bad ban lun maw sha ka jingialang.
Ki Pulit kila lah ruh ban kem ia ka Belina M Marak bad Dilche Ch Marak kiba dei ki Nongialam ka BJP Mahila Morcha hynnin ka miet sngi Nyngkong. Ki pulit kila kthong ban kem ia ki na ka jaka ba mih ka jingkulmar hadien ba ki paidbah kila iakawang maw halor ka jingkynshoit jong ki.
Arngut ki Nongialam ka Trinamool Congress ruh kiba iadonlang bad ki paidbhur bad ba kynshoit ban pynkulmar, ki dei kiba la ithuh da ki Pulit bad mynta kine ki briew kila phetrieh ialade.
Uwei na ki Nongialam ba hakhmat eh ka Trinamool la lah ban pynithuh naka video bad une u briew u kyrteng u Salseng R Marak.
Une u briew u dei na Selsella bad u dei uba la iakhun teng ia ka elekshon MDC jong ka GHADC na Siju-Baghmara hynrei ula shah rem. Une u briew ula mih iakhun ia ka elekshon na ka ticket jong ka UDP.
U Salseng Marak uba sah wai ha Dakopgre, pyrshah ia ka Gate No 2 jong ka Doordarshan TV tower, ula iakhun ia ka ticket jong ka Congress ban iakhun ia ka elekshon MLA na Selsella mynta u snem.
Une u briew u dei ruh uba la shah khmih bha ha ki bor ka Wildlife halor ka jingkynnoh ba u donkti ha ka jingkhaii tuh ia ki kyrbei sha Bangladesh.
