Shillong, Naitung 11: U CEO bad Nongseng ka CR Project, Bah Christopher Rani hynne ka sngi nyngkong, ula byrngem ban mudui da ka mukotduma pynmynrain durkhmat ia ka Kot Khubor Shillong Times halor ka jingkynnoh bamsap na ka jingpyntrei ia ka Project Diagnostic Centre ha Pastuer Institute, Lawmali.
Haba kren sha ki nongthoh khubor, u Bah Christopher ula ong ba kane ka khubor bala pynmih ha kane ka kot khubor phareng ba manla ka sngi, ka dei kaba shu thaw hi bad ka bym don satia ia ka jingshisha.
“Lada kam thoh ia ka khubor kaba dei kaba pynshong nongrim ruh kat kum ki jingshisha ym ba shu mutdur, ngan ai mukotduma ia ki bad ngan sa shem ia ki hapoh ka Iingkashari” ula ong.
Ka Sorkar Jylla kala soi ia ka Memorandum of Understandong (MoU) bad ka Suraksha & Salvia Globan LLP ban tei ia ka Diagnostic Centre lyngba ka Public-Private Partnership (PPP) Mode.
Haba pynpaw ba ka khubor kala shu kynnoh beit beit baka don ka bamsap, u Bah Christopher uba mihkhmat ia ka Suraksha & Salvia Global LLP ula ong “ Nga panmap ba kam don satia kaba kum kata namar hangne ki don lut nadong hadong. Kane ka Project ka dei lyngba ka PPP mode bad ka jingsiew lane kano kano ka song kaba dei ban wan sha ka project ka wan naka Sorkar Pdeng lyngba ka DONER Ministry, ia kaba ka Sorkar Jylla kam pat ioh satia ia ka pisa haduh mynta. Haba kumta, kumno ka Sorkar Jylla kan siew ia kane ka pisa ba T. 100 klur. Hato ki tip ba ka dei ka project ba T. 100 klur namar ka lah ban dei T. 1000 klur lane T. 5000 klur ruh”.
U Bah Christopher ula pyntip ba haduh mynta, ka Sorkar Jylla ka dang pynlut tang T.10 lak n aka bynta ki tiar bad bynrap “Ka kompani kaba ioh ban shalan ia kine ki tiar kala dep pynpoi ia ki tiar”.
Kat kum ka jingong jong u, baroh ki tiar ki shimpor kumba 8-9 bnai ban shna bad ki dei kiba wan pynpoi na shabar ka Ri, kaba shimpor haduh 2 bnai ban pynpoi da ka jhad.
Haba pynpaw ba ia kane ka project la pyntrei na ka bynta ki paidbah ka Jylla Meghalaya, u Bah Christopher ula ong “Nga buh jingkylli ba nangno ki ioh ia kata ka T. 100 klur. Kila shu pynthoh bria ia ngi bad pyni ba ngi dei kiba sniew ba oh ngi la ioh T.100 klur na ka bynta kaei bad ngi la pynlut kai ruh ia ka….Nga kwah ban tip balei ba ki khlem wan ban iakren bad ngi”.
“Ngi dei ki kynhun naka Jylla bad kam don satia kata ka jingleh Benami. Ngi shu iateh lok bad ki stad ki jhad na shabar bad kane kam dei ka benami” ula ong.
Haba kylli, u bah Christopher ula pyntip ba ka Pathology Laboratory kala treikam bha mynta ha kane ka Diagnostic Centre hynrei “Ngim shym la pynbna paidbah eh namar ngi sngewthuh ba bun ki kwah ban ioh ia shibun ki lad jingsumar ym tang ka Pathology”.
Haba pyntip ba kane ka Diagnostic Centre kan sa treikam pura noh hapoh ka 6-7 bnai, u Bah Christopher ula ong “Ngin dang donkam ia ka por khnang ba ngin lah ban ai ha phi ia kaba janai tam ha baroh ki jingshakri. Hapoh ka 6 bnai, barioh ki tiar sumar kin sa don lut bad ka Pathology kala don lypa mynta bad ngi lah ban sdang da kane”.
