Nongpoh, Naitung 11: Lai ngut ki briew kila mynsaw na ka jingleit rat ka trok ia artylli ki kali hynne ka sngi ba-ar ha surok National Highway-6, ha Mawdiangum, Ri-Bholi District.
Kat kum ka khubor Pulit, kane ka trok ba don u nombor ML-11-8124 kaba wan na Guwahati ban leit sha Shillong, kala pynher sted bha haduh ba u nongniah u khlem lah tehlakam shuh ia ka kali.
Ha kane ka jingjia, kane ka trok kala leit ban rat ia ka Mahendra Bolero Pickup ba don u nombor MLA-10-C-0885 bad ia kawei ka trok kaba pynieng harud surok kaba don u nombor UP-22 AT-1640. Ha kane ka jingjia lai ngut ki briew kila mynsaw bad la pynkit mar mar ia ki sha Civil Hospital Nongpoh.
Kine ki laingut kiba mynsaw ki kynthup ia u nongniah jong ka trok uba kyrteng u Bantei Kynjing ba 22 snem, u Ononto Majhong ba 21 snem uba dei u nongniah ka Bolero Pickup lem bad u Ravi Kumar uba dei u nongbud jong ka trok ba pynieng harud surok.
Ia kane ka jingjia la pyntip noh sha Nongpoh Police Station Traffic Branch kiba la leit mareh sha kane ka jaka ban pynlong ia ka jingtohkit kaba bniah.
