Nongstoin, Naitung 18: Ka seng WKSU bad ka WYF kila dawa ia ka MeECL baka dei ban pynbeit ryntih noh ia ka rukom pynlip bording haba pynpaw ba ka jingpynlip bording kam ktah ne pynjynjar tang ia ki nong Sor hynrei ia baroh salondar kynthup ki jaka nongkyndong.
Haba iakren bad ki nongthoh khubor, u Nongiala ka WYF samla Donlad Marwein ula pynpaw ba ka seng kam lah pdiang ia ka jingpynbna u CMD ka MeECL ban pynjynsur ia ka kynta pynlip bording tang ha Shillong, Jowai bad Tura, kaban long tang 2 kynta shisngi katba kiwei ki jaka kan long haduh 5 kynta.
“Balei ha Shillong Jowai bad Tura yn pynlip bording satang 2 kynta, katba ha ki jaka nongkyndong lane ha kiwei ki District, ka jingpynlip bording ka long beit 5 kynta”, u la ong bad bynrap, “Kum ia kane ka jingleh ngim sngew iahap bad ngim sngew lah ban pdiang, namar haba ka Damsite ka la dap um hynrei dang pynneh sah ia ka jingpynlip bording”.
“Lada dang hap pynlip bording ruh dei ban long ryntih ia baroh, namar mynta lah ar bnai lai bnai, ki paidbah ki la shem jynjar khamtam ha ka dong ka thain jong ngi, bun bah ki khun samla kiba trei ia ki kam ba bun jait lyngba ka bording, ki la shah ktah jur. Khamtam eh kito kiba shim da ka ram ka shah ha kaba ki shem jingeh ban siew ia ka ram ba ki shim tang na ka jingpynlip bording ba la palat pud” ula ong.
Kumjuh ruh u Nongialam ka WKSU samla D.Sun nongialam u la ban ia ka juh ka phang halor kane ka jingleh jong ka tnad MeECL bad ka sorkar. U la ong ba kane ka jingleh kaba noh tarajur, ka pynpaw pynban ba kam don ka jinglong ryntih ha ki liang baroh hapoh ka Jylla. Namar kata ki bor ba dei peit ia kane ka bynta, ki dei ban da pyrkhat sani ym ban shu noh shilliang lada dei ha sor ne nongkyndong.
