Shillong Naitung 18: Ka Myntri kaba khmih iaka tnad Aiñ Kong Ampareen Lyngdoh hynne ka sngi Baar, kala ong ba ki pulit kidei ban ieng rasong bad ban shim iaka rai kaba skhem ban pynthikna iaka jingshngain bad jingiada ia baroh ki nongshong shnong khamtam haba wat ki MLA ruh kim shngain shuh.
“Wat ki MLA ruh kim shngain shuh. Nga tharai baroh ki tip ia kata. Ngi la iohi ba bun ki MLA bad ka iing ka sem ka jongki kala shah pynjulor ha kine ki 4 bnai kiba la dep. Kumta ki pulit kidei ban ieng rasong bad ban shim iaka rai kaba tyngeh” ong ka Kong Ampareen, kaba ka iing jong ka ruh kala shah pynjulor dang shen bad uwei u rangbah briew ula leit ruh ban rung hapoh iing jongka da ka jingthmu ban shim iaka jingim.
“Ki MLA, ki heh ophisar, ki bor pulit kin hap ban leh ia kawei ka kam lem kumta kan poi sha kaba bakla bad donkam ban pynbeit ia kane ka kam, ban pynneh pynsah iaka jingshngain kaba long kawei na kiba kordor haka jingim” la ong ka Myntri Sorkar bad ka bynrap, “Nga thikna ba u Symbud Myntri Rangbah uba khmih ia ka kam pohiing u dang khmih ia ka kam bad ki pulit ruh kila ieng katkum ka jingdonkam bad nga sngew ba lada long kumno kumno ruh, ngi hap ban pynbeit ia kane ka kam”.
Ka Myntri Sorkar kala banjur iaka jingdonkam ban pyrkhing iaka jingpyndonkam ia ki rynsan Social Media bad ka ong, “Ngin hap ban leh da kaba tyngeh pyrshah ia kiba leh tam pud, ngi donkam ban ia shong bad pyrkhat la ka long kaba donkam ne ka bym donkam ban thaw ia ki aiñ ki kanun ban tehlakam iaka imlang sahlang halor ka jingioh leh laitlan”.
Kala ong ba baroh kim dei kiba sniew hynrei ki don ki katto katne kiba pyndonkam bakla bad ngi hap ban treishitom ban pynthikna kumno ngin pyrkhing iaki lem kumta kan synshar ka jingleh kum bym don aiñ bad yn ym lah ban ong pat ba ka sorkar kam shym la leh eiei.
Ha kaba iadei bad ka jingshah kem jong ki 15 ngut ki thei die met, ka Kong Ampareen Lyngdoh kala ong ba ka kam die met kala long kum ka kam khaii kaba heh naka bynta ki kynthei.
“Nga sngew ba dei ban pynthikna nyngkong ia kine ki jingtip baroh bad ki pulit mynta kila sdang trei bha ban pynthikna ba yn ym don mano mano kiba iengkai ne iaidkai shiteng miet. Kano kano kaban buh iano iano ha ka jingma, ngi hap ban long kiba peitngor, ngi hap ban long kiba husiar bad nga tharai ba ki pulit kial leh ia ka kam kaba dei bad ngi donkam ruh ban don ia kiwei pat ki lad ki lynti bad ban pynthikna hashwa ba ngin kam ba kino kino kiba ieng ha surok kidei ki nongdie met namar kane ruh ka long kaba bakla” ong ka Kong Ampareen.
Ha kaba iadei bad ka jingrai ki pulit ban pynjur iaka jingpahara ha ka nongbah Shillong, ka Kong Ampareen kala ong ban pynjur palat ia ki pulit ruh kam long kaba bha bad lada duna palat ruh kam long kaba bha.
“Nga tharai kaba ngi donkam mynta kadei ba ngin kyntu ia ki paidbah ba kin long kiba peitngor bha ialade bad lada ki kwah ban lehkem kumba ki ju leh, lada ki kwah ban mih shiteng miet kidei ban nang ban don ruh iaka jingkitkhlieh. Nga mut, shisien ba la pyndonbynta ia ki pulit ban long kiba peitngor kumta kan kylla long pynban kum ka jingeh ia kaba phi hap ban rai.
