Shillong, Naitung 14: U Myntri Rangbah ka jylla u Conrad K.Sangma, ula leit jurip ïa ka thaiñ Khatarshnong Laitkroh C & RD Block ban khmih halor ka jingseisoh ki kam pynroi bad ban pynthikna ia ka jingkut jingmut jong ka sorkar ban kyntiew ïa ka thaiñ bad ban pynkup bor ïa ki nongshong shnong ha ka roi ka par.
U Myntri Rangbah ula leit ban peit ia ki jaka kiba la pyntrei iaka skhim Mahatma Gandhi National Rural Employment Guarantee Act (MGNREGA) hapoh Laitmawsiang bad Laitsohpliah bad ula ïamir jingmut ruh ba ki nongtrei Job Card, ki Self Help Group (SHG) kumjuh bad ki Village Organization (VO) kiba la ïa don ryngkat lang ha baroh kitei ki ar jaka, kiba la pynpaw ruh halor ka jingkut jingmut ban pynïaid shakhmat ïa ki jingtreikam na ka bynta ka roi ka par.
U Myntri Rangbah ula pyntip ia ki sienjam bala shim da ka sorkar Meghalaya na ka bynta ka shnong Laitryngew da kaba ong; “Ka jingphaikhmat ka jong ngi ka long ban pynkylla dur lyngba ka jingpyntrei ïa ki projek bad ïa ki sienjam ki ban kyntiew ïa ka jinglong jingman jong ki nongshong shnong. Kane ka kynthup halor ka jingbuh ïa ka jaka ïalehkai na ka bynta ki khynnah ne ka ‘children’s park’ bad ka jaka kilan met ne gym hapoh ka kper jong ka krem Cave Park khnang ban pynshlur ïa ki nongshong shnong ha ka liang ka koit ka khiah”.
“Ngi la kut jingmut ruh ban aibor shuh shuh ïa ki kynhun seng hapoh ka shnong ne Village Organisation (VO) da kaba pynïoh ïa ki kor ki bor bad kiwei pat ki jait tiar kiba lah ban pynmih ïa ki tiar ki tar pynsahnam bad ruh ban kyntiew ïa ka kam jngohkai pyrthei bad ngi la ai ka jingmynjur na ka bynta ka jingshna ïa ki lieng, ki jaka pynïeng kali, ki paiñkhana, bad ki lynti ïaid kjat hapoh kane ka park” ula bynrap.
U Myntri Rangbah ula ong “Ka jingseisoh jongka jaka jngohkai ha Umiam ne ka Umiam Viewpoint kala pynioh mynsiem ia ngi ha ka Sorkar. Ka thong ka jong ngi ka long ban kyntiew bad pynbha ha kaba ïadei bad ki dukan hapoh Tynam Masi Viewpoint ka ban khring bad pynsngewtynnad ïa ki nongwan shangkai pyrthei. Ngin kyntiew ruh ia ki jingtei ban buh sahnam bapher bapher ka ban kyntiew shibun ïa ka kam jngohkai pyrthei” ong u Conrad.
Haba kren sha ki nongshong shnong bad ki dkhot jong ki Self-Help Group hapoh Laitsohpliah, u Conrad ula ong bad ha kine ki 50 tylli ki snem naduh ba la ïoh ïala ka jong ka jylla, la lah ban kyntiew ïa ka jingdon jong ki SHG jong ki kynthei sha ka 5000 tylli ha kaba la lah ruh ban pynïoh ïa ka jingïarap pisa kaba kot sha ka 30-35 klur. Hynrei, ha kine ki 5 snem ba la dep ka sorkr MDA hapoh ka jingïalam jong ka National People’s Party la sakhi ïa ka jingkiew shakhmat lyngba ka jinglah ban thaw shuh shuh ïa kumba 45,000 tylli kiwei pat ki kynhun SHG ha ryngkat ka jingpynïoh ïa ka jingïarap pisa kaba kot sha ka 500 klur ban kyrshan ïa ki jingtreikam ki jong ki.
Ula iathuh ruh ba ka sorkar ka la shimkhia ha kaba ïadei bad ka jingkyrpad jong ki nongshong shnong ban weng ïa ki jingeh kaba ïadei bad ka jingkyrduh um hapoh ka thaiñ bad lyngba ka Sohra Water Supply scheme, la mang T.48 klur khnang ban lah ban pyntrei noh shen ïa ka projek pynïoh um.
Lyngba ka National Rural Livelihood Mission, la lah ban thaw haduh 44,067 ki Self Help Group (SHG), kaba la aijingmyntoi ïa haduh kumba 427,195 tylli ki longïing.Nalor kata la kyntiew shuh shuh sha ka 4,607 tylli ki Village Organizations (VO) bad haduh 39,571 ki SHG ki la ïoh pdiang ïa ka jingïarap pisa kaba kot baroh sha ka T. 171.56 klur. Ki VO kila ïoh pdiang ïa ka jingïarap kaba kot sha ka T.192.34 klur.
Pule ruh: Shah khot hajir u President ka HNYM ba byrngem thaw seng kaikhlaw
