Shillong, Naitung 13 : U Myntri Rangbah ka Jylla Conrad K Sangma hynne ka sngi Palei ula ong ba ka Office Memorandum (OM) kala dep mih ban pyntreikam ia ka Roster System bad kane ka dei ka rai kaba khatduh.
U Conrad haba iakren bad ki nongthoh khubor ula ong ba ka jingkylli ban phadien biang ia ka Roster kan ym mih shuh.
U Conrad ula jubab ia kane halor ka jingkylli kaba iadei bad ka jingshong shah jingit ba khlem pud jong ka ACHIK ba dawa ia ka Sorkar ban pyntreikam ia ka Roster System naduh ki snem bala leit noh bad ban wanrah ia ka Winter Capital ha Tura, West Garo Hills District.
“Ka (OM) ka dei kaba la rai khadduh bad ka jingkylli ban phaidien biang ia ka, kan ym mih shuh” ong u Conrad haba pynkynmaw ba ka Sorkar Jylla kala dep ban iasyllok bad baroh ki kynhun bapher bapher shuwa ban wanrah ia kane ka OM ba thymmai.
Kat kum ka jingong jong u, ka ACHIK ruh kala iadonlang ha kane ka jingialang.
“(Hynrei), kaei kaba kongsan ka long ban pynthikna ba ka Roster System ka dei ia kaban pyntreikam bha kumba ka long ha ki sngi ban sa wan, bnai bad snem bad kane ka long kaba kongsan ia ngi bad kane ka dei kaba ngi khmih lynti” ula ong.
U Myntri Rangbah ula ong ba ka Sorkar kam lah satia ban weng noh ia ki briew kiba dei na kiwei pat ki jaidbynriew hadien bala dep thungkam ia ki namar kane kam iahap bad kam long hi ruh.
Halor ka jingdawa ia ka Winter Capital, u Conrad ula ong ba kane ka dei ka jingdawa kaba la slem bha bad kine baroh ki dei kiba don jingiadei bad ka ioh ka kot.
“Nga la kren naduh ka sngi ba nyngkong ba baroh ki jingdawa kiba wan ha kane ka bynta ki dei kiba don jingiadei bad ka ioh ka kot bad katto katne ki jaidbynriew ha ka imlang sahlang ki sngew ba da ka jingioh iaka Winter Capital, ka roi ka par kan wan. Kumta,ka dei kawei na ki lynti ba la khmih lynti ia ka jingwan ka roi ka par ha ki kitei ki bynta jong ka thain” ula ong.
Haba pynpaw ba ka Sorkar ka la pynthikna ba ki kam pynroi kila poi ha baroh kawei ka Jylla, u Myntri Rangbah ula ong ba ha ka sien ba nyngkong he, ka Sorkar kala buh ia ki Mini Secretariat ha ki thain bapher bapher jong ka Jylla ba kynthup ia ka Tura, Jowai bad Pynursla.
