Agartala, Naitung 12 :Ka seng ki Nongrep ba don jingiadei bad ka CPIM, kila pynlong ia ka rally jingiakhih ha Agartala hynne ka sngi Balang, halor ka jingdawa ban kyntiew lem ia ka ioh ka kot bad ka rukom im jong ki nongrep da kaba pyntreikam ia ki 15 tylli ki mat jingdawa.
Ki dkhot na ka seng Tripura Kshet Mazdood Union, All India Kishan Sabha, bad Tripura Rajya Ganamukti Parishad kila iashimbynta ha kane ka rally kaba la sdang na Rabindra Satabarshiki Bhavan bad iaid lyngba ki surok jong ka Nongbah.
Ki nongiakhih kila ia pyrta slogan pyrshah ia ka Sorkar, ha kaba ka jingdawa kala pynleit jingmut halor ka jingdonkam ban kyntiew noh ia ka Minimum Support Price (MSP) na ka bynta ki mar rep khamtam namar ka jingkiew ki mar ki mata.
Ka jingdawa jong ki ka kynthup ruh ia ka jingai symbai ba bha, ki sboh dawai, ki dawai khniang sha ki nongrep khlem kano kano ka jingsiew pisa.
Nalor kane, kila dawa ruh ban pyntreikam ia ka National Rural Employment Guarantee Scheme (NREGA) bad ka Tripura Urban Employment Program (TUEP) hapoh ka kam rep kam riang bad kiwei kiwei ki kam ba don jingiadei.
Ki Nongiakhih kila dawa ka jingai kam kam dei ban duna ia ka 200 sngi ha ka shisnem ia ki nongbylla ha nongkyndong, ki nongrep ha kaba ka bainong sngi ka die ban long T. 600.
Ki Pulit kila khang lynti ia kine ki nongiaid rally hajan ka All India Radio Station ha ka por ba ki dang pyrshang ban jam shakhmat ban leit aiti ia ka dorkhas sha u Myntri Rangbah ka Jylla ha Assembly.
Ka Chief Minister Office (CMO) kala ai ktien ba namar ba dang iaid ka Dorbar ha Iingdorbar Thaw Ain ka Jylla, u Myntri Rangbah un sa pynbeit ia ka jingialang bad ki nongialam jong kine ki nongiakhih ha ki sngi ban sa wan hadien ba kut ka Dorbar.
