Shillong,Naitung 10: Namar ka jingiakynad jaidbynriew bym ikut shuh ha Manipur, ka Regional Institute of Medical Sciences (RIMS), Imphal, kala kyrpad ia ka Ministry of Health ba kan pynbeit ia ka jaka shim klas ia ki 29 ngut ki samla pule Medical jong ka Under-Graduate bad Postgraduate ka RIMS ha Meghalaya bad Assam.
Haba pynpaw ba kine ki 29 ngut ki samla pule riewlum kila phet na Imphal na ki kam iaumsnam bad sheptieng ban wanphai pat, ka RIMS kala pyntip ruh sha ka Health Ministry ba ka jingpynbeit ia ki jaka shim klas ha ka Institute lane ha kiwei ki Institute ka Manipur ka lah ban nym pat long satia namar ba ka jinglong jingman kam pat long shngain ia ki samla ba kin wan sha ki jaka pule.
Ha ka shithi sha u Joint Secretary (NE) ka Health Ministry bala phah ha ka 7 tarik Naitung, u Deputy Director (Administration) ka RIMS Naoren Indrakumar Singh ulaong ba ki klas jong ki Under-Graduate bad Post Graduate kila sdang ha RIMS Imphal naduh ka 22 tarik Jymmang hynrei 29 ngut ki samla pule (17 ki MBBS Under-Graduate bad 6 ki BDS Under-Graduate bad 6 ki Post Graduate) mynta kim lah satia ban wan shong klas namar ka jingbym shongshngain hapoh ka Jylla.
U Singh ula kyrpad ia ka Health Ministry ba kan tuklar ha kaban lah pynbeit ia ki jaka shim klas ia kine ki samla pule shabar ka Manipur kynthup ban pynioh jingbit na ka National Medical Council na ka bynta ki 17 ngut ki samla pule MBBS Under-Graduate ba kin pynbteng ia ki jingpule jong ki ha NEIGRIHMS ha Shillong, 6 ngut ki BDS Under-Graduate ha Regional Dental College, Guwahati bad 6 ngut ki Post Graduate ha ka Guwahati Medical College lane kiwei kiwei.
Lah ban kdew ba bun ngut ki samla pule Medical na Meghalaya bad kiwei ki Jylla ka thain Shatei Lam Mihngi kila phet na RIMS Imphal ha u bnai Jymmang hadien ka jingkhie ka thma iapher jaidbynriew hapdeng ki Meitei bad ki Kuki.
Kumjuh ruh, palat 800 ngut ki Kuki kiba la kylla phetwit namar kane ka thma iapher jaidbynriew, kila wan shong riehtngen mynta ha Shillong.
U President ka Kuki Students’ Organisation, Shillong,Dr Jangkhohao Hangshing ula ong ba ka jing khein ba kila buh ia ka jingwan ki briew na Manipur ka dang long tang haduh ka taiew ba nyngkong jong u Jylliew bad lada niew lang bad ki samla pule, ka jingdon jong kiba wan phet sha Shillong kaba kot ia kumba 1000 ngut.
Pule ruh: Lap ki Pulit ia ki metiap jong 3 ngut ki Nongtrei ka ISBR ha New Shillong
, Imphal, kala kyrpad ia ka Ministry of Health ba kan pynbeit ia ka jaka shim klas ia ki 29 ngut ki samla pule Medical jong ka Under-Graduate bad Postgraduate ka RIMS ha Meghalaya bad Assam.){kind=link}