Imphal, Naitung 09 : Ka Sorkar Manipur kala hukum ia ka Tnad Pulit ban ujor da ka ejahar pyrshah ia ka Zomi Students’ Federation (ZSF) namar ka jingpynmih ia ka kot halor ki kam iaumsnam ha Manipur bala ai kyrteng “The Inevitable Split- Documents on State sponsored ethnic cleansing in Manipur, 2023″.
Ia kane ka hukum la pynmih da u Commissioner ka Tnad kam Pohiing ka Manipur, kaba bthah ruh ia ki Pulit ban leh tyngeh ia ki nongpynmih ia ka kot bad ruh ban khein beain ia kane ka kot.
U Commissioner ula hukum ban pynngat kam beain pyrshah ia u nongthoh bad ka Seng hapoh ka kynhun 154 bad kiwei kiwei jong ka IPC bad ban pynmih ia ka warrant pyrshah ia ka kot hapoh ka kyndon 95 jong ka Code of Criminal Procedure, 1973.
Haba kynthoh ia kane ka shithi ujor jong u Commissioner, ka Zomi Students’ Federation kala kam ba ka Sorkar Manipur kala pynmih da ki hajar sien ki jingthok lyngba ki lad pathai khubor electronics bad ki kot khubor naduh ka 3 tarik Jymmang, 2023.
“Kane ka jingpynduh jait ia ki jaidbynriew kala paw shai ba ka dei kaba la thmu lypa. Nalor kane, ka dei kaba la kyrshan bad ialam da ka Sorkar Jylla. Namar kata, ngi kynnoh beit ia ka Sorkar Manipur bala ialam da u Myntri Rangbah N Biren Singh uba dei u Meitei” kala ong.
Ka ZSF kala pynbna ba kan iai bteng ban pynpaw ia ki jingsngew jong ka bad ba kan nym riej na ki jingpyrshang thombor jong ka Sorkar ia ka hok ban kren bad pynpaw, kaba dei ka hok tynrai hapoh ka Riti Synshar ka Ri.
