Shillong, Jylliew 26: U Myntri Rangbah ka Jylla Conrad K Sangma ha ka sngi Nyngkong ula pyntip ba ka Sorkar Jylla kala peit thuhbha ia ka jinglong jingman ha khappud ka thain Pynursla bad Bangladesh hadien ka jingther kuli sha suin da ki shipai BSF hynnin ka miet ha lad Umsyiem ban pynsaphriang ia ki riew paidbah.
Haba iakren bad ki nongthoh khubor, u Conrad ula ong ba ka jinglong jingman hi kala jai jai bad ka Sorkar ka dang peit thuh bha ia ka jinglong jingman.
Ula ong ba kane ka jingjia ba jia hynnin ka miet, kala jia hadien ba katto katne ki briew kiba donkti ha ki kam khaii tuh, kila shah pynpulom ka kam khaii haki shipai kala lam pat sha ka jingialum paidbad bad jingialun maw sha ki shipai.
“Kum ka jingpynphai kylliang, ki shipai kila siat 4 kuli sha suin hynrei ym sha ki briew. Ha kane ka jingkawang maw, kala mih ka huri hura bad kila don katto katne kiba mynsaw malu mala hynrei kam dei satia na ka jingdie kuli” ula ong.
Haba pyntip ba ka Sorkar kala phah tohkit ia kane ka jingjia, u Myntri Rangbah ula iai ban ba ki 4 kuli bala siat sha suin ka dei tang ban pyntieng ia ki paidbah ban nym ialum bad ong “Kumba nga ong, kane ka jingjia ka mih na ka kam khaii tuh”.
Haba kylli halor ka jingpyrshah ki paidbah ia ka jingdon ki BSF ha ki shnong briew, u Conrad ula ong ba ka Sorkar kan sa iakren ia kane ka kam lada don kino kino ki jingpynsngew na u paidbah.
“Hynrei kumba nga ong ba na ki kaiphod ba nga ioh, ka dei ka kam ba don jingiadei bad ka jingkhaii tuh bad namar bala ioh bat da ki shipai bad ioh kurup ia ka mar, kala mih kane ka jingiakawang maw bad bitor” ula ong.
