Shillong, Jylliew 23 : Ka Khasi Hills Autonomous District Council (KHADC) hynne ka sngi Thohdieng, kala rai ban kyrpad ia ka Sorkar Jylla ba kan ai jaka lang ia ka Council ha New Shillong Township, ba kan pynkynriah noh ia ka Ophis ne ka Council Building sha kane ka jaka.
Ia kane ka rai la shim da ka Executive Committee ka Khasi Hills Democratic Front (KHDF) ba ialam da ka NPP, ha ka jingalang ba nyngkong eh jong ka, kaba la pyniaid da u Chief Executive Member (CEM) Bah Pyniaid Sing Syiem.
Haba iakren bad ki nongthoh khubor, u Bah Pyniaid ula ong “Ka EC ba thymmai kala shong bishar ia ka jingtyrwa mang tyngka u snem 2023-2024 bad rai ban kynthup ia ka jingtyrwa ban kyrpad na ka Sorkar Jylla ban ai jaka lem ha kaban pynkynriah noh ia ka Council Building sha New Shillong Township”.
“Ka daw jong kane ka long namar ka Council kala mad ia ka jingkhapngiah namar baroh ki lai tnad treikam-ka Executive, Legislative bad Judiciary- ila iatreilang na kane ka Ophis” ula bynrap.
U Bah Pyniaid ula ong ruh ba bun na ki Tnad ba kongsan jong ka Sorkar Jylla ruh la pynkynriah sha New Shillong ban pynkylluid ia ka Nongbah Shillong. “Ngi ruh ngi sngew donkam ban leh lang kumjuh n aka bynta ka jingsuk jong baroh” ula ong.
Haba kylli, u CEM ula pyntip ba ka Council kan sa thaw ia ka Committee ka ban khlieh da u EM ba khmih ia ka Council Assets & Building, ba kan iakynduh ia ka Sorkar Jylla ha kaban iakren ia kane ka kam.
Ia kane ka jingtyrwa la wanrah nyngkong eh ha u snem 2019. Hynrei namar ka jingpynjari ia ka jingsynshar u Lat ne Administrator Rule ha katei ka por, ka Council kala pynsangeh noh shuwa ia kane ka jingtyrwa, ula ong.
U Bah Pyniaid ula ong ba ka EC kan dang ban shim rai ba kumno kan pyndonkam ia ka Building ba mynta hadien bala pynkynriah sha NST.
“Hynrei, namar ba ka don hapdeng ka jaka iew, lehse ngi lah ban pyrkhat ba kumno ngin lah pynmih pisa na kane ka building hynrei ngin dang ban shim rai halor kane ka bynta” ula bynrap.
Ha kajuh ka por, u Bah Pyniaid ula pyntip ba ka Executive Committee kala shim rai ruh ban pyntreikam noh ia ka Trading by Non Tribal Regulation Act kumba ka long.
“Ngi dang iai bteng ban leit talasi ia ki kam khaii beain jong ki bar Jylla bad ngin leh tyngeh kaba lah ruh ban long da u pud ban khang syndon ia ki dukan jong ki bym don Trading Licence na ka Council” ula ong haba bynrap ba ka EC kan pyrrkhing bha pyrshah ia ki kam khaii beain hapoh u pud u sam jong ka Council.
Nalor kane, ka EC kala ai jingmynjur ruh ia ka KHAD Services (Amendment) Rules, 2023 kaba thmu ban pynjynsur ia ka rta iohkam jong ki samla wadkam hapoh ka Council ka ban long haduh 37 snem ka rta. Ka EC kan sa wanrah ia ka Bil ha kane ka Dorbar Lyiur ba mynta.
U Bah Pyniaid u pyntip ruh ba ka EC kala ai jingmynjur ia ka KHAD (Protection and Promotion Traditional Medicines) (First Amendment), 2023. Kane ka dei kaba don jingiadei bad ka jingai syrnot ia ki nongsumar briew hapoh u pud u sam ka Council.
Pule lang ia kane: Pynlong jingduwai ki Skul Catholic ha Ri-lum Garo ban wan noh ka jingsuk ha Manipur
 ba ialam da ka NPP, ha ka jingalang ba nyngkong eh jong ka, kaba la pyniaid da u Chief Executive Member (CEM) Bah Pyniaid Sing Syiem.){kind=link}