Tura, Jylliew 23 : Ki Skul ka Balang Catholic kiba don ha kylleng ka Ri-lum Garo, kila pynlong ia ka jingduwai ba kyrpang hynne ka step sngi Thohdieng na ka bynta ka Jylla Manipur bad ka jingshongsuk shongshngain kaba la thut na ka jingmih ka jingiakynad jaidbynriew ha kane ka Jylla.
Kane ka jingduwai ba kyrpang ka long kum ka dak ban pyni ia ka jingiadon ryngkat bad ki paidbah ka Manipur, kiba la mad ia ka jingjynjar naka jingmih ka thma iapher Jaidbynriew, bad ban duwai ruh ba kan kutnoh kane ka jinglong jing man ba mynta khnang ba ka jingsuk kan wan phai pat ha ka thain.
Baroh ki skul ka Balang Catholic ha ki 5 tylli ki District ka Ri-lum Garo kila iashimbynta shitrhem ha ki Peace Assembly, kiba la pynlong hala ki jong ki jong ki jaka pule.
Ka thong ba hakhmat eh jong kane ka peace assembly ka dei kaba la leh na ka bynta ban pynsngewthuh ia ki samla pule halor ki jingjia ha Manipur bad ka jingdonkam kyrkieh ban pynsangeh iaki kam iaumsnam bad ki jingthombor ia ki jingim ki briew bad nongkynti kynthup ia ki jaka mane Blei.
Ha kane ka jingiaduwai kyrpang, ki samla kila ioh jinghikai halor ka jinglong jingman kaba long mynta ha Manipur bad ka jingkongsan ban leh ia ki kam ki ban wanrah ia ka jingsuk, ka jingiamap markylliang bad ka jingialong kawei. Ki Samla pule kila pynpaw ia ka jingkyrshan ia ka jingsuk lyngba ki placard ba ki rah, kaba ban jur ia ka jingkongsan jong ka jingialong shipara bad jingiatylli.
Kane ka peace assembly bad rally bala pynlong ha ki skul Catholic ka Ri-lum Garo ka pyni ia ka bor jong ka jingiatylli bad ka jingsngew para briew. Ka phah ruh ia ka khubor ka jingsngewlem bad jingkyrshan ia ki briew kiba la shem lanot ha Manipur da ka jingthmu ba ia ka sur jong ki yn sa iohsngew, bad ka jingsuk kan wanphai pat.
Ki bor pyniaid jong kane ka peace assembly kila pynpaw ia ka jingsngew nguh ia baroh kiba la wan iashimbynta lang bad pyndem ha ka jingduwai n aka bynta ki paidbah ka Manipur. Kila khot ia baroh ki paidbah ba kin iasnohkti lang ha kaban wanrah ia ka jingsuk, ka jingiasngewthuhlang ym tangha ka thain hynrei ha ka pyrthei baroh kawei.
Pule ruh: Manipur : Khang lynti ki Longkmie ia ka CBI ban tohkit ia jingshah tuh tiar siat ki Pulit
