Kular ka KHADC ban wanrah pat ia ka mynsiem sngew shngain sha ki paidbah ha Block-II

Hadien ka Dorbar Lyiur yn leit iuhkjat ka EC sha Block-II

Shillong, Jylliew 23 : Ka Executive Committee ba thymmai ka KHADC ba ialam da ka NPP, hynne ka sngi Thohdieng, kala kular ban wanrah pat ia ka “mynsiem sngew shngain’ sha ki paidbah ba sah ha ki Shnong ba hap hapoh ka Block-II, kaba don ha khappud ka Jylla bad Assam.

Haba iakren bad ki nongthoh khubor hadien ba pyniaid ia ka jingialang EC ba nyngkong, u Chief Executive Member (CEM) ka Council Bah Pyniaid Sing Syiem ula ong ba ka EC ba thymmai kala rai ban shimkhia bha ia ka kam iakajia khappud.

“Ngin ia khmih ia ki jingeh jong ki paidbah ba shong bas ah ha ki jaka khappud” ong u Bah Pyniaid haba pyntip ba hadien ka Dorbar Lyiur jong ka Council, ka EC kan sa leit ban iuhkjat ha kine ki shnong kiba hap hapoh Block-II khamtam kito kiba shah ktah na ka jingiai bteng ki kam pyni bor jong ki bor District ka Karbi Anglong.

Haba kular ba ka EC ba thymmai kan ieng iada ia ka hok ki paidbah ha khappud la ka long kumno kumno ruh, u Bah Pyniaid ula ong “Nga kwah ban kular ia ki paidbah ba kane ka EC ba thymmai kan nym ailad ia ka Sorkar Assam lyngba ki bor District ba kin thombor ia ki briew jong ngi kiba sah ha ki jaka khappud”.

Haba pynpaw ba ki don shibun ki jingkynnoh bala wan sha ka Council pyrshah ia ki bor District ka Karbi Anglong, u CEM ula ong “Namar kane, nga la iakren bad u CEM ka KAAC bad kyrpad ia u ha kaban pynthikna ba ki briew jong ngi kim dei ban shah thombor ha ki jaka khappud. Kumjuhruh, nga la phone ia u MP ka Karbi Anglong ba un ai ka jingkyrshan bad iatreulang namar ha kane ka EC ba thymmai, ngi kwah ba ka jingsuk bad jingshngain kin don ha ki shnong ba hap hapoh Block-II”.

Haba kylli halor ka jingdawa ban pynkynriah noh ia ki shnong na Block-II sha Meghalaya, u Bah Pyniaid ula ong “Ia mynta hi ngan ym lah ban ong eiei ia kane namar kala don ka Regional Committee bad ngi iadon bynta lang ha kane ka Committee. Namar kata, hadien ba ngi la leit shong jingialang, ngin sa sngewthuh ia ka jingmut jong ka Sorkar ba kumno kan pynbeit ia kine ki kam iakajia pud”.

“Nga kwah ban ban biang ba da ka jingwan kane ka EC ba thymmai, kan long ka jingkyrkhu bad kan pynthikna ba ki paidbah ha khappud kin don ia ka mynsiem sngewshngain” ula bynrap.

Kat kum ka jingong jong u, ka EC kan sa shim ia ka nongrim kaba skhem halor kane ka kam hadien ka jingialang jong ka Regional Committee.