Shillong, Jylliew 19 : U Chairman ka kynhun synrop Khasi Hills Democratic Front (KHDF) Bah Pyniaid Sing Syiem ula ong ba ka United Democratic Party (UDP) kala ioh lad 4 snem ba kan ialam ia ka Executive Committee hynrei mynta ka NPP ka kwah ban shimti noh halade ban pyniaid ia ka Council kum ka Party kaba don buh eh ki MDC.
Lah ban kdew hangne ba ka NPP ka don haduh 12 ngut ki MDC ha ka Iingdorbar ba 29 ngut ki MDC bad uwei u MDC shusieh jong ka KHADC. Ka UDP ka don 8 ngut ki MDC, bud saka Congress kaba don 6 ngut bad ka HSPDP-2 ngut.
Ka Executive Committee ka United Democratic Alliance (UDA) ba ialam da ka UDP kala khyllem noh hynne ka sngi da ka jingwanrah No-Confidence Motion pyrshah ia u CEM Bah Titosstarwell Chyne, da u MDC ka Rambrai-Jyrngam Bah Bajop Pyngrope kaba la ioh ia ka jingkyrshan na ki 17 ngut ki MDC ka IIngdorbar.
Haba kyntait ia ka jingthoh u Chief Executive Member (CEM) ban leit noh ka KHADC Bah Titosstarwell Chyne ba ka jingwanrah ia ka NCM ka dei ka kam shet kylla, u Chairman ka KHDF ula ong “U Bah Titos u dei u paralok ba ia ieid bha n aka UDP bad ula long CEM haduh 4 snem. Ngim dei satia na kajuh ka party. Namar kata, ngim lah ban pdiang ba kane (NC) ka dei ka kam shetkylla namar ka KHADC ka dei kaba treikam laitluid bad hangne ngi lah ban iatrei bad kino kino ki party kiba don ia kajuh ka thong ha kaban iada bad pynkhlain ia ka bha ka miat jong ka Council”.
“Lada ngi iaid da u nombor ruh, ngi lah dei ban shimti ia ka EC la slem bha hynrei ngi la rai ban ailad shuwa ia ka UDP. Ka UDP kala ialam ia ka EC haduh 4 snem bad mynta ngikwah ia ka (UDP) ban ailad lem ia ngi ban ialam ia ka EC” ula ong.
U Bah Pyniaid ula bynrap “Nga kwah ban kren shai bay m don mano manor uh ba lah ban khang lynti ia ngi ban ialam ia ka EC lane ban iatreilang bad no bad no ruh hapoh ka Council”.
U Bah Pyniaid ula kdew ruh ba ka NC kala ioh ia ka jingkyrshan na ki 17 ngut ki MDC ba kynthup ia 11 na ka NPP bad 6 na ka Congress haba bynrap “Ki don ruh katto katne ngut ki MDC ka UDP kiba khlem kyrshan ia u CEM mynta ka sngi”.
Halor ka jingkynnoh ba kane ka jingleh ka NPP ha KHADC ka dei kaba la bthah da ki High Command, u Bah Pyniaid ula ong ba ym shym la don mano mano ruh kiba pyniaid lane bthah ia ka kam bala leh da ki 18 ngut ki MDC.
“Ka NC kam don jingiadei eiei ruh em bad ka High Command (jong ka NPP) namar ka District Council ka dei kaba treikam laitluid. Phi lah ban sngewphylla ba kumno ka NPP ka lah ban iatreilang bad ka Congress? Hynrei kane ka dei kaba itynnad hangne ha District Council namar ka EC ka lah ban iatrei badno badno ruh. Kam don satia kano kano ka jingkhang” ula ong haba pynpaw ba ki kam ba iadei bad ka Sorkar Jylla kim don jingiadei eiei ruh em bad ka District Council.
Pule lang ia kane: Kam u Bah Ronnie : Ap ka Administrator Rule ha KHADC lada ym kyrshan ka INC ia ka NPP
