Shillong, Jylliew 16: Ki ar tylli ki kynhun ka Khliehmawlieh Youth Club kan iakhun pyrshah iaka Rangdajied United FC ha ka phainal jong ka Meghalaya State League 2023 kaban long ha ka sngi saitjain ha SSA Stadium, First Ground, Polo.
Kane kaj ingiakhun kan sdang ha ka por 3 baje mynsngi ha kaba kine ki kynhun kin iakhun tyngeh ban iohrah ia ka nam lahduh jong ka MSL bad ka Jessie Lyngdoh kan rwai ruh iaka jingrwai kaba la thaw hi kaba dei ka Anthem jongka MSL 2023.
Ka lynti iaid jong kine ki ar tylli ki kynhun ban poi shaduh ka phainal ka long kaba shongkhia bha ha kaba ka Rangdajied kala long ka lahduh ha ka Group B bad Khliehmawlieh ka lahduh jongka Group D.
Kine baroh ar tylli ki kynhun kila mad iaka jingrem haka jingiakhun ha ka wat kaba nyngkong haka semi phainal hynrei kila lah ban ialehkai bha ha ka wat ka baar ban poi sha ka phainal.
Ha ka wat kaba nyngkong ka Rangdajied kala shah pynliem da 3-0 ha ka Shillong Lajong katba ka Khliehmawlieh kala shah pynrem da 1-0 ha ka Mawlai, hynrei kine ki ar tylli ki kynhun kila ialehkai bha ha ka wat ka bar, ha kaba ka Khliehmawlieh kala pynliem iaka Mawlai da 3-1 (3-2), katba ka Rangdajied kala jop da 3-0 iaka Lajong bad kumta ka jingiakhun kala poi noh sha ka Tie Breaker bad ka Rangdajied kala pynliem iaka Lajong.
Kine ki ar tylli ki kynhun ki don ia ka jingkyrmen kaba skhem ban iohrah ia ka nam lahduh bad kila pynpaw ia kane haba iakren bad ki nongthoh khubor hynne ka sngi.
“Ka jingjop ka jong ngi ia ka semi final kala ai mynsiem ia ni hynrei ngi hap ban bteng ban ialehkai bha” ong u Assistant Coach ka Rangdajied Bah Aibanjop Shadap.
“Ki kynhun kiba la poi sha ka phainal kidei kiba dei hok ban poi namar ba kila trei shitom bad nga don iaka jingkhmih lynti ba kan don ka jingaireng bha na ka Khliehmawlieh” ong u Bah Shadap.
U Captain jong ka Rangdajied u Niawkorlang Kyndiah ula ong ba ki rangialehkai kila duh mynsiem bha na ka jingshah rem haka wat kaba nyngkong jong ka semi phainal ban shah thep haduh 3 kol hynrei kila don iaka jingngeit kaba skhem ban iakhun tyngeh namar ba ki kwah ban iohrah iaka khusnam bad kin da ialehkai tyngeh bha ha ka phainal.
“Ka jingkhmih lynti jong baroh ar ki kynhun ka long kaba jur bha, Ngi hap ban trei shitom bha naduh ba sdang” ong u Vice Captain ka Khliehmawlieh u Liverson Iawphniaw.
“Kan long ka jingthaw histori iaka club bad West Khasi Hills baroh kawei lada ngi ioh rah iaka nam lahduh” ula ong.
Katba u Manager ka Khliehmawlieh Bah Joyfulstar Marngar ula pynpaw ka jingsngewnguh ia baroh ki nongkyrshan kiba la wan ban ai jingkyrshan iaka kynhun bad ula kyntu ia ki ba kin wan ban ai jingkyrshan biang lashai ka sngi kaba long ka jingiakhun kaba kongsan bha.
Pule ruh ia kane: Dawa ka VPP ban pynbeit ia ka jingthep kam Pulit ha ka Tnad MLP
PEIT:
