Shillong, Naitung 08: U Myntri Rangbah ka Jylla Conrad Kongkal Sangma hynne ka sngi Thohdieng, u la plie paidbah ia ka Training Centre jong ka Directorate of Educational Research & Training (DERT) ha Malki, Shillong kaba la dep ban tei naduh u snem 2020.
Happy to inaugurate the Annexe of the Directorate of Educational Research & Training (DERT), at Malki. The Annexe will further the education of teachers which will in exchange improve the quality of education imparted to our students. All the best to team DERT@dpradhanbjp pic.twitter.com/kece6cuWrz
— Conrad Sangma (@SangmaConrad) July 8, 2022
Ia u Myntri Rangbah ka Jylla la synran da u Myntri ka Tnad Pule Puthi ma Lahkmen Rymbui kum u Symbud Kongsan ha ryngkat ka MLA ka thain Kong Mazel Ampareen Lyngdoh bad ki Heh Ophisar ka Jylla kynthup u Additional Chief Secretary ba khmih ia ka Tnad Pule Puthi Bah D.P.Wahlang bad kiwei kiwei.
Haba kren ha ka jingialang, u Myntri Rangbah ula ban jur halor ka jingdonkam ban don ia ki Nonghikai kiba tbit khamtam ba ka Jylla kala don ia ki Nonghikai kat kum ka jingdonkam. U ong ba da ka jingplie ia kane ka jingtei jong ka DERT, kan sa iarap ia ki Nonghikai ban saindur ia ki Khynnah skul bad ki Samla na ka bynta ka lashai lashisngi kaba biang.
“Kat kaba ki samla jong ngi ki lah ban leh ha ki sngi ban wan, ngi donkam ban pynthikna ba ngin saindur ia ki ha ka lynti kaba biang eh khnang ba kin long ki nongtei bad ba lah ban synniang bun bun shah sha ka jingkiew irat ka Jylla ha ka ioh ka kot” u la ong.
Kane ka Ophis jong ka DERT ka dei kaba la bei tyngka da ka Asian Development Bank (ABD) ha ka jingmang tyngka ba kot T. 8.33 klur. La sdang ban tei ia kane ka Ophis naduh u bnai Kyllalyngkot 2018 bad la aiti sha ka Tnad ha ka 30 tarik u Nailur, 2020.
Kat kum ka jingiathuh u Bah D.P. Wahlang, ka Sorkar ka don jingthmu ban plie noh ia kane ka Ophis ha u snem 2020 hynrei namar ki jingjia ki bym lah kiar, ki kam kim shym la iaid satia kumba la thmu. U Bah Wahlang ula pyntip ba ka jingthmu haba tei ia kane ka Ophis myn nyngkong eh ka long ban buh ia ka B.Ed College.
U Bah Wahlang ula ong ba dei hadien ba la mih ka jingpyrkhat ia ka jingdonkam ia ka Teachers Training Centre bala pynkylla ia kane ka jingtei kum ka jaka jong ka DERT. U la ong ba da ka jingwan ka Education Policy 2020 ba thymmai, kane ka jingtei kala long kum ka jingpyllait ksuid ia ka Jylla khamtam ba ka Jylla ka donkam ban ai jinghikai pyntbit ia ki Nonghikai.
U Bah Wahlang u la ai khublei ia I MLA ka thain, ki bor shnong, ka tnad PWD bad ong ba dei ka jingiatreilang jong baroh ba kila lah ban thom ia baroh ki jingeh ba kila mad ha ka jingpyntrei ia kane ka jingtei.
I MLA ka thain, Kong Ampareen ila ong ba ka dei ka sngi kaba kmen ba kane ka Sorkar kala lah ban wanrah ia kum kane ka Institution. “Kane ka Institution kala shakri ia ki paidbah, kane ka jaka kala lah ban ai jingkyrmen biang ia kiba bun ki briew kiba shah ktah ha ka khlam Covid-19” i la ong.
I Kong Ampareen i la ong ruh ba ka dei ka burom ia ka Constituency ba kan ioh ia kum kane ka Institution ka ban pyniaid ia ka NEP.
Na ka liang u Myntri ka Tnad Pule Puthi ma Lahkmen Rymbui ula ong ba mynta ka sngi ka dei ka sngi ba thymmai ha ka histori jong ka DERT. “Nga da kmen shisha ba ka DERT kala shim ia ka bynta kaba kongsan tam ban pynwandur ia ka pule puthi ha ka Jylla khnang ba ki samla pule kin lah ban iakhun bad kiwei pat ki samla jong ki skul bapher bapher” ula ong.
