Agartala, Jylliew 14 : Ka jingpang khieshohrih (malaria) kala syllad mynta ha bun ki shnong jong ka Jylla Tripura bad haduh 4361 ngut ki briew kila ngat ha kane ka jingpang khamtam kiba sah sha ki jaka kyndong jong ki paid riewlum.
Ki Heh ka NHM ki pyntip ba kane ka jingpang kala syllad ha bun ki shnong khamtam ha khappud hynrei haduh kat haduh mynta ym pat don satia mano mano ruh ba iap na ka jingpang.
Ka Sorkar kala phah ia ka kynhun ki doktor sha ki jaka ba khie ka khieshohrih ban ai jingsumar bad ai dawai ia ki paidbah da kaba pynlong ia ki medical camp.
Kat kum ki khubor, kiba bun ki shnong kiba hap hapoh ka Chawmanu, Ganganagar bad Ambassa Administrative Block ha Dhalai, ki dei kiba shah ktah ha kane ka jingpang.
Ha u snem bala lah, arngut kila iap na kane ka jingpang. La ong ba ka jingpang khieshohrih ka dei kaba jur eh ha kane ka por lyiur ha ka thain.
