Ong u Bah Paul : Ka VPP ka pyrshang ban leh boss watla ka jop tang 4 ngut ki MLA

Shillong, Jylliew 05: U Myntri Kam Jngohkai ka jylla u Bah Paul Lyngdoh uba long ruh u Working President ka United Democratic Party (UDP) ula ong ba ka seng sain pyrthei Voice of the Peoples Party (VPP) kaba ialam da u Bah Ardent Miller Basaiawmoit ka dei ban pdiang ia ka rai jong u paidbah ha ka por elekshon bad ula ong ruh ba ka VPP ka pyrshang ban pyniaid ia kiwei kat kum ka mon jong ka (dictate terms) watla kala jop tang 4 ngut ki MLA.

“Kumno ki nongkyrshan VPP ki pyrshah haba u kyrtong u jongi u wan haka kyrdan kaba saw ha ka elekshon kaba dang shu dep? Nga sngew ba kidei ban nang ban pdiang iaka rai jong u paidbah namar ba kane ka West Shillong constituency kala jied ia u Bah Paul Lyngdoh bad kam dei kaba ula jied hi dalade ban ioh long MLA. Balei kin wan hangne ban rah ia ki jingthoh, nga kwah ban ai jingmut ba kidei ban ap haduh u 2028 bad ba kin rah biang ia kitei ki jingthoh” ong u Bah Paul Lyngdoh.

“Kawei na ki daw ba nga la shah ther bad shah kynthoh jur, ka dei namar ba ngi ju ong ba ka thaiñ Motphran kadei ka thymmei jong ki jingiakhih. Na kane ka thaiñ, ki don 3 tylli ki constituency – Mawkhar-Jaiaw, Mawlai bad Mawprem. Ma ki (VPP) kila lah ban jop na Mawkhar bad Mawlai hynrei kila pheil pat ban na Mawprem.”

Une u nongialam ka UDP ula kynnoh ruh ba ka VPP ka pyrshang ban pyniaid ia kiwei kat kum ka mon jong ka, watla kane ka seng kala jop tang ngut ki MLA ha ka iing dorbar kaba don 60 ngut ki MLA.

“Ngin ym ailad ia ki ba kin leh kumtei, namar ba ki don bun ruh ki briew kiba ieid jaidbynriew bad yn ym don mano mano ruh kiba lah ban shimti hi halade iaka jingieid iaka jaidbynriew” ong u Bah Paul.

Ula ong ruh ba ka jingiakhih ka VPP ka dei tang ka drama politik, “Phim dei ban sngewlyngngoh ba lada ki seng sain pyrthei ki leh drama politik tangba u dei pat ban don pat u lain. Ngi dei ban batai shai ia uta u lain, ngim lah shirta ban pynkohnguh jubor ia ki paidbah tang da ka jingsngew”.

“Ka Ba-ar, ki paidbah dang shen kila dep ban jied ia ki nongmihkhmat, mynta kaei kata ka jingdonkam ban phah mih ia ki na ki jaka trei ban pynlong iaka jingiakhih hakhmat Secretariat? Haba phi jied ia u nongthawaiñ, kadei ka kamram ka jongu ban mihkhmat na ka bynta ka sur jong u paidbah, khnang ba ki paidbah kin lah ban bteng iaka kam kaba ki trei ki ktah man la ka sngi” la ong u nongiala mka UDP.

U Bah Paul Lyngdoh ula kyntu iaka seng VPP ba kan iasyllok bad ki nongiasaid aiñ kiba tip bha iaki aiñ ki kanun haka riti synshar ka ri, kiban iarap ia ki ha kaban batai iaka riti synshar ka ri haba ki dawa ban pynkylla thymmai noh iaka Reservation Policy.

“Ngi don iala ka nongrim, hynrei ma ki (VPP) kim shym la pule iaka Constitution of India, Fundamental Rights, Fundamental Duties, ka jingmut jong ka rukom bhah ka bym noh shiliang bad balei ka jylla kadei ban leh iala ka bynta ha kaban wanrah ia ka jingiabiang ryngkat lang-baroh kine ki dei ki bynta jong ka Article 14, 15 bad 16 haduh ka Article 30 jongka Constitution ka ri India. Nga tharai ki donkam ban iasyllok bad ki nongiasaid ain kiba shemphang bha iaka constitution jong ka ri kiban iarap ia ki ha kaban pysngewthuh iaka Constitution,” la ong u Bah Paul.

Ula ong ruh ba ka mat jong ka Reservation Policy kam dei ban long ka “jingiakob leh drama” hapdeng ki seng saiñ kiba don ha ka jylla.
“Kane kam dei ka jingiakob leh drama ban pyni mano ba dei u briew uba bha ne u briew uba sniew. Kan ym treikam kumne, namar kane kadei shaphang ka rukom pyniaid ia ka kam sorkar, ban thaw ia ki polisi bad jingshemphang ki nongialam. Kumta ngi dei ban shah btin lynti ia ki paidbah ha kitei ki nongrim ym haka jingsngew ka jong ngi, lem kumta katno sien yn hap pynkylla iaka policy tang namar ba don iaka jingsngew” ong u Bah Paul.

Une u nongialam ka UDP ula ai jingkyrshan ban thaw iaka Expert Committee ban khmih ia ka jingpynkylla iaka Reservation Policy.

“Ngi donkam ia ki riewstad namar lada ngi la nang la stad katno katno ruh, ngim ym lah ban tip lut baroh hynrei ki riewstad halor ka reservation policy, kidei ki briew kiba tip bha shaphang ka demographic profile, kiban tip bha iaka Constitution, Law, Jurisprudence, kidei kiba tip ia ki kyndon aiñ bad ka rukom pyniaid iaka iing dorbar thawaiñ ka jylla, legal precedence, bad haba don ne tip ia kine kiei kiei baroh kumta kidei ki riewstad. Hynrei lada u nongniah taksi ne u nongshong dukan madan yn wan ban batai kylla kumno ban pyniaid iaka jylla, kumta kan don jingmut aiu shuh ia nga ban shah jied kum u nongmihkhmat” la pynkut u Bah Paul Lyngdoh.