Nongpoh, Jylliew 02 : Ki Nongshongshnong ka Shnong Mawknor, Ri-Bhoi District, kila iamih ban iaker jingker hi dalade ia u Transformer bala shu ieh rynghang jong ka Meghalaya Energy Corporation Limited (MeECL) ban iada ia ki jingjia ba sngewsih khamtam ia ki Khunlung Khynnah bad ki jingri jingdup.
Kane ka jingiamih paidbah ha Mawknor kala jia ha ka 31 tarik Jymmang hapoh ka jingialam jong u Rangbah Shnong, ka Seng Longkmie bad ki Samla jong katei ka Shnong ha Ri-Bhoi.
“Ngim banse ban mih hi dalade ban ker jingker ia une u transformer namar ka MeECL kala shu ieh rynghang, kaba lah ban buh jingma ia ki jingim jong ki briew bad ki jingri jingdup. Ngi hap ban phikir bha khamtam na ka bynta ka jingshngain ki khunlung khynnnah” ong u Rangbah Shnong Bah Kmar Kurbah.
Kat kum ka jingong jong u bad ki Seng Longkmie, ki Nongshongshnong hi la bunsien kila pynpaw ia ka jingsngewkhia halor ka jingieh rynghang ia une u transformer haba pynpaw ba kane ka jingleh ka MeECL ka pyni ia ka jingbym don jingphikir khyndiat ruh ia ka jingshngain u nongshongshnong.
Ka President ka Seng Longkmie Kong Sayantis Sakra kala ai khublei ia u Rangbah Shnong, ki Nongialam Shnong bad ki Seng Samla kiba la mih shakhmat ban shim ia kane ka sienjam.
Ha kajuh ka por, kala kyntu ia ka MeECL ba ka dei ban shimkhia ha kaban ker bha ia ki transformer kiba don ha kino kino ki shnong ki thaw hapoh ka Jylla khnang ba kan long ka jingshngain ia ki mynsiem briew bad ki jingri jingdup.
