Shillong, Jylliew 01 : U Co Chairman ka Meghalaya State Development Reform Commission (SDRC) bah Process T Sawkmie u la lum ia ka jingialang ia ki Engineer ka tnad PHE, kumjuh ruh ia ka Excutive Committee jong ka dorbar shnong Mawiong Umjapung ban iakren halor ka skhim sam um kaba T.24 klur tam kaba u la pynioh naduh ka por ba u long MLA ka Mawlai.
Ia kane ka jingialang la pynlong ha committee hall jong ka Secretariat, Shillong hynnin ka sngi Balang ka 30 tarik u Jymmang.
U Bah Process u pyntip ba ha kane ka jingialang, la iakren sani bha halor ka jingkyrduh um ha Mawiong Umjapung wat hapdeng ka skhim sam um ba T. 24 klur bala mang sha kane ka shnong.
“Kaei kaba nga sngewsih ka long ba ka PHE ka khlem lah ban pyntreikam ia kane ka T. 24 klur tam. Nga la lum ia kane ka jingialang ban iapyrkhat ia ka skhim bala mang. Kumba sngewthuh hi, kane ka T.24 klur ka dang don bad ngi kwah ba na ka liang ka tnad PHE kan pyntreikam noh ia ka” ong u Bah Process.
“Kumba ka long mynta hi ki paidbah ka Mawiong Umjapung ki jynjar bha, namarba na ka por sha ka por ki pump ki la duh bad sniew, kumta na ka liang ka PHE department ka la mang ia ka skhim kaba thymmai ban thied haduh saw tylli ki pump… Nga ngeit skhem hadien ba la pyntreikam ia kane ka skhim, ngi don jngkyrmen ba ki pump kin ym pynthud shuh,” ong u Co Chairman.
U ong ruh, “Nga khmih lynti ynda la pyntreikam ia kane ka skhim ki paidbah Mawiong Umjapung kin sa ioh pahuh ia ka umbam umdih.”
Une u MLA barim ula pyntip ruh ba ula buddien ia ka skhim Jal Jeevan Mission bala pyntrei ha ka shnong Mawkynroh Umshing, Mawtawar, Umsaw Mawjynrong, Mawsiatkhnam, Umrynjah bad Umphrew.
Nalor kine, u kyntu ruh ia ka tnad PHE ba kan shimkhia lem ia ka um sorkari, khnang ba ki paidbah kin ym mad jingeh.
