Shillong, Jylliew 01 : Ka Sorkar Jylla kala pynmih ia ka hukum ba kan pyniaid biang da ki Odd-Even number ia ki kali kamai ha Nongbah Shillong, ka ban treikam naduh ka 5 tarik Jylliew kum shibynta ban tehlakam ia ka jingkhapngiah jong ki surok ha Nongbah.
Ia kane ka hukum la pynmih da ka Deputy Commissioner ka East Khasi Hills Kong R.M Kurbah hynne ka sngi Palei haba pyntreikam ia ka hukum ka Iingkashari Meghalaya High Court ba pynmih ha ka 16 tarik Nohprah 2021 bad ba 11 tarik Jymmang 2023-kiba bthah ia ka Sorkar ban wanrah ia ki lad ki lynti ban pynduna ia ka jingkhapngiah ki surok ha Shillong.
Ka Deputy Commissioner ka pyntip ba kane ka hukum Odd-Even Number kan treikam tang ia ki kali kamai (SPTS bus, SSPTS- Maxi cab, ki taxi rong iong bad stem) kiba iaid na Kashari Point shaphang ka Police Bazaar bad Motphran.
Ka Deputy Commissioner ka pyntip ba ki kali ba don ia ka odd number (1,3,5,7,9) ki dei ban iaid tang ha ka sngi Nyngkong, sngi Balang bad sngi Thohdieng katba kiba don ia ka even number (0,2,4,6,8) kin iaid tang ha ka sngi Ba-ar, sngi Palei bad sngi Saitjain.
Ka pyntip ruh ba kane ka hukum kan nym treikam satia ha ka Sngi U Blei.
Nalor kane, ka Deputy Commissioner kala pyntip ba baroh ki kali ki dei ban don ia ka High Security Registration Plate (HSRP) bad ki dei ban don ia ki Registration Certificate haba don ka jingkhmih bniah (inspection) ia ki kot ki sla ha kano kano ka por.
“Kino kino kiba pynkylla (tampered) ia ki number plate kin shah pynshitom kat kum ki kyndon ain ba kynthup ia ka jingpynduh shisyndon ia ka licence niah kali” ong ka Deputy Commissioner.
Ka Deputy Commissioner kala pyntip ba kane ka hukum kan sdang treikam noh naduh ka 5 tarik u Jylliew, 2023.
