Shillong, Jymmang 31: Ka Shillong Lajong kala long ka lahduh haka Group C jong ka Meghalaya State League-2023 hadien ba kala pynliem iaka Mawten da 5-1 ha MDSA Ground, Mawkyrwat hynne ka sngi Balang.
Kane kadei ka sien ka balai kaba ka SLFC kala iakhun hynne ka sngi ba kala lah ban kamai 9 point da kaba jop ia baroh ki jingiakhun bad kala jam shaphrang ban iaka Seven United kaba la kamai 8 point na ki 4 tylli ki jingiakhun.
U Babysunday Marngar ula thep ia ka kol ha ka minit kaba 2 hynrei ka Mawten kala ioh ban pynphai iaka kol ha ka minit kaba 21 lyngba u Oversharp Iawphniaw bad kane kadei ruh ka kol kaba ka SLFC kala shah thep nyngkong eh ha ka jingiakhun iaka MSL mynta ka kynti.
Ka SLFC kala ioh ban thep ia ka kol ka baar ha ka minit kaba 23 lyngba u Hamedamanbha Wahlang bad u Marngar ula ioh ban thep ia ka kol ka baar ha ka minit kaba 37 bad ka Lajong kala tam da 3-1 ha ka kylla step.
Ha ka kylla miet ka SLFC kala ioh thep sa 2 kol lyngba u Hardy Cliff Nongbri kata ha ka minit kaba 76 bad 90’+2 ban pynskhem iaka SLFC ban jop ia kane ka jingiakhun.
Ha Jowai, ka jingiakhun kala long hapdeng ka Pdengkarong pyrshah ia ka Sein Pynbhalang ha kaba ki rangialehkai kila ialehkai bha.
U Wanbor Langshiang ula ioh thep ia ka kol ha ka minit kaba 4 bad haka minit kaba 40 na ka bynta ka Pdengkarong bad u Kindness Mukhim pat ula ioh thep 2 kol ha ka minit kaba 17 bad 77.
Katba ka Sein Pynbhalang kala ioh thep thik tang shi kol lyngba u Paiabanteiskhem Bhoi ha ka minit kaba 33.
U Mukhim ula ialehkai bha ha kaba ula pynbunkam ia u nongapkol ka Sein Pynbhalang u Rishanki Syngkon uba la hap ban iada bunsien ia ka bol ban ioh rung shapoh kol bad kila don ruh ki kabu kiba u Mukhim ula shut hynrei ka bol kala dei ia u dieng kol.
Ka jingiakhun haka sngi Palei ha ka Group A ha Shillong kan long hapdeng ka Umkseh pyrshah iaka Umrit ha ka por 3 baje mynsngi katba haka Group B ha Jowai ka jingiakhun kan long hapdeng ka Mulait United pyrshah iaka Rymbai Iawpynsing ha ka por 2:30 mynsngi.
Haka Group D ha Tura, ka Atong Matgrik kan iakhun pyrshah iaka Selsella Sports Association ha ka por 3 baje mynsngi.
