Shillong Jymmang 29: Ka Seng sain pyrthei Hills State People’s Democratic Party (HSPDP) kala rai ba kan sa leit iakren bad ka sorkar MDA-2 ban iatai halor ka jingdawa ban pynbeit thymmai noh ia ka Reservation Policy jongka jylla.
Kane ka rai kala mkih n aka jingialang jong ka Seng kaba long hynne ka sngi Nyngkong ha Shillong Club, kaba la wan iashimbynta daki Nongialam kynthup u Myntri Sorkar Bah Shakliar Warjri.
“Ka Reservation policy ka dei ka mat ha ka Election Manifesto jong ka seng bad lada ki paidbah ki kwah ba dei ban pynbeit thymmai ia kane ka policy, ka HSPDP kan pyrshang ban pynbha ia ka. Ngi lah iakren ha ka jingialang bad namar ngi dei ki dkhot ka MDA, ngin sa rah ban iakren ia kane ka mat bad ka sorkar la kan long ha ka kynhun jong ka MDA ne ha ka commitee kaba thaw da ka sorkar” ong u President ka HSPDP u Bah KP Pangniang haba iakren bad ki nongthoh khubor.
“Ngi kyntu ia u Myntri Rangbah ban ai ia ka rynsan ban iakren halor kane ka mat. Ngi don shibun kiei kiei kiba ngin pynpaw halor ka Reservation Policy khamtam haba kane ka policy kadei kaba don ruh iaki jingduna. Kum ka seng ngi kwah ban khmih bniah bha bad ngin sa ai ia ki jingai jingmut jong ngi” ula ong.
U Myntri ka tnad Sports & Youth Affairs u Bah Shaklair Warjri, ula ong ba ka Reservation Policy kadei ka mat kaba don ha Manifesto jong ka HSPDP kumta ka party kan sa shimkhia ban iakren bad ka sorkar synroplang halor kane ka mat.
U Bah Pangniang ula pynkynmaw ruh ba naduh mynshwa u President barim ka HSPDP bah HS Lyngdoh bam kwai ha dwar u Blei, ula ong ba lada ka jaidbynriew ka kwah ban iohnong dei ban ai da ka jylla lajong na ka bynta u Khasi-Jaintia ka ban weng shi syndon ia ka jingeh jong ka jaidbynriew.
Ula iathuh ba ka seng ka dang iaid shakhmat bad kiwei pat ki kynhun na rilum Garo ban ia dawa lang ban ai jylla lajong noh na ka bynta ki Khasi bad ki Garo.
