Guwahati, Jymmang 29: Ka Catholic Bishops of North East India hynnin ka Sngi U Blei, kala buh biang ka jingkyrpad ban wanrah noh ia ka jingshongsuk shongsain ha Manipur hadien ka jingsaphriang biang ki khubor ba la khie biang ka jingia kynad bad jingiaumsnam ha Manipur.
“Ka long kaba sngewsih kthang ba ngi la iohi ia ki jingjia ba itriem kiba jia ha Manipur dang shen. Ngi sngewlem ia ki para shynrang bad kynthei kiba la kylla lanot ha kine ki kam pyntriem bad mad ia ka jingsohsat” ong u John Moolachira, Chairman ka North East India Regional Bishop Conference.
Ula ong “Ka jingduh noh ki jingim bad ki nongkynti kala jur bha. Bun ngut ki paidbah kila mih noh na kane ka Jylla. Ka jinglong jingman ka dang iai bteng ban don ha ka jingshongsyier. Watla ngi la sdang ia ki kam ai jingiatap, hynrei ngim don satia ha ka khep ban lah tem ia ka jinglong jingman. Ngi pyrta shla ia ki jingiarap na ka bynta kito kiba la im jynjar”.
Kane ka jingkyrpad kala mih ruh hadien ba ka Bishop of North East India Regional Bishop Conference kala pynlong ia ka jingialang ba kyrkieh ha Silchar hadien ka jingialang pynkyndang ia u Joachim Walden kum u Auxiliary Bishop ka Aizawl.
“Ngi kyrpad ia ki riew shemphang bad ki briew ba pyrkhat jngai jong ki jaidbynriew bapher bapher ha Manipur ba kin pyrkhat lem ia ka lynti kumno ban tem noh ia ka jinglong jingman, ban wad ia ka lynti kaba lah ban tei bad ka lynti kumno ban iapynbeit noh ia ki jingiapher jingmut” ula ong.
