Shillong, Naitung 6:U Nongialam ka Congress ba dei ruh u MDC ka Mylliem Bah Ronnie V Lyngdoh u la pyntikna ba u MLA barim ka Mawphlang bad president ka East Khasi Hills Congress, Bah Kennedy Khyriem u la mih na ka Congress ban thmu ban iasoh noh sha ka NPP.
U Bah Ronnie u la iathuh ruh ba haduh mynta kim pat tip ia ka duh ka dang kaba pynlong ia utei u rangbah ban mih noh na ka party namar tang ha ka taiew ba la dep u dang shu kynduh ia u President rangbah ka MPCC, Bah Vincent H Pala.
Na ka liang ka Congress mardor hadien ba ka ioh jingtip halor kane ka la jied da uwei pat u rangbah ban ialam ia ka party ha katei ka constituency ba tip kyrteng kum u Bah L Kurbah uba kin pynskhem ha kane ka sngi Saitjain.
Lah ban kdew hangne, u Bah Kennedy u la aireng na ka tiket Congress ha ka elekshon shiteng samoi kaba dang shu lah shen na Mawphlang hadien ka jingkhlad noh jong u MLA Bah SK Sunn. Ha katei ka elekshon ki la don lai ngut ki kyrtong kiba aireng kata u Bah Eugene Lyngdoh khun u Bah SK Sunn uba iakhun na ka UDP, nangta u Bah Kennedy na ka Congress bad ruh u MDC ka Congress u ba leit ban iasoh noh sha ka NPP Bah Lamphrang Blah.
