Shillong Jymmang 26: Ka United Democratic Party (UDP), hynne ka sngi thohdieng kala dawa naka sorkar Meghalaya Democratic Alliance ban pyntreikam iaka roster system nangne shakhmat.
Ia katei ka rai la shim ha ka jingialang kaba la lum da u President ka UDP u Bah Metbah Lyngdoh ia kaba la wan ban iashimbynta da ki MLA bad ki nongialam jong kane ka seng sain pyrthei.
Haba iakren bad ki nongthoh khubor, u Bah Metbah Lyngdoh Lyngdoh, “Hashwa ba ka sorkar jylla kan lum ia ka jingialang ban ai jingpynshai ha ka 17 bad 19 tarik u Jymmang, ngi la shong jingialang arsien bad mynta ngi la rai ba kan long kaba bha shibun bad kaba shong nongrim ba ka sorkar kan pyntreikam beit iaka roster system nangne shakhmat”.
“Ngi sngew ba ka jingpyntreikam iaka roster system kadei ban long nangne shakhmat namar ba ym shim la don ia kino kino ki rekod kiba la buh thikna bad ym shim la don ruh ka roster rejister kaba la buh ha baroh kine ki snem kiba la leit. Kumta kan ym long kaba iahap ian iano ruh ban kam ba ki rekod kiba don mynta ki long kiba dei” ong u Bah Lyngdoh.
Ula ong, ba ka seng kala rah ia ki katto katne ki mat ha ka por ba long ka jingialang kaba la lum da u Myntri Rangbah bad ki MLA jong ka sorkar MDA kata lada donkam kin leit biang sha u Myntri Rangbah ban pan ia ki jingpynshai ha kaba iadei bad ka Reservation bad ka jingpyntreikam iaka roster system.
U Nongialam ka UDP ula ong, ba kane ka ishu ka long kaba sngewkhia bha kumta ka long kaba donkam ban iatai sani ha ka rynsan kaba kyrpang ha kaba yn lah ban pynbeit ia baroh ki jingsngewkhia.
Ula ong ba ka sorkar kala thaw iaka committee halor ka roster kaban khlieh da ka Myntri Sorkar bad na ka liang ka UDP kan sa phah ia uwei na ki MLA jongka ban mihkhmat iaka seng ban pynsngew ia ki jingsngewkhia halor ki ishu kiba iadei bad ka roster system. “Kan dei beit thik tang halor ka roster system,” ula ong biang.
U Bah Lyngdoh ula ong, ka seng kan sa iakren bad ka sorkar jylla ha kaba iadei bad ka jingdonkam ban pynbeit thymmai noh iaka job reservation policy ne ka bhah thungkam.
“Ngi hap ban sngewthuh shwa ia ka bynta kaba nyngkong kaba dei ka roster system. Ka roster system ka long ha kaba iadei bad ka jingpyntreikam iaka reservation policy kaba mynta. Mynta, nga kwah ban kren da kaba shai, ba kum ka seng ngi la kdew shai bad ym don ruh kiba lah ban kyntait ba ha ka Manifesto jong ka seng la kdew shai ia ka jingdonkam ban pynbeit thymmai iaka reservation policy. Ngin sa sdang ia kane ruh ha ka rynsan kaba dei, namar ngi ruh ngi dei kiba don byntalang bad ka sorkar, ngin iakren bad ka sorkar bad ban shimkhia ia kane ka mat ia kaei kaba donkam ban pynbeit thymmai ha ka reservation policy,” ong u President ka UDP.
Ha kaba iadei bad ka jingshah thngan u President ka VPP u Bah Ardent M Basaiawmoit, u President ka UDP ula ong, ba u don u Myntri Rangbah bad ki Myntri Sorkar kumta kin sa shimkhia halor katei ka mat.
