Shillong, Jymang 24: Ka kynhun ki nongrep na thain Bhoirymbong hapoh ka shatri ka Hills Farmers Union (HFU) kila leit ujor sha ka Khasi Hills Autonomous District Council (KHADC) halor ka jingkynnoh ba ki don ki Nongkhaii ba mahajon kiba dang ot kilo ia ki mar rep jong ki.
Ka HFU haka jingialam u General Secretary bah Alphon Kharsyntiew kila iakynduh ia u Chief Executive Member (CEM) ka KHADC bah Titostarwell Chyne haka jingdon u Executive Member (EM) ba dei khmih iaka tnat Trade bah Rangkynsai Kharbuki.
Haba kren sha ki lad pathai khubor u CEM ka KHADC u bah Titostarwell Chyne ula iathuh ba ki nongrep ka thain Ri-bhoi khamtam kito kiba rep syieng kila ujor ba ki dang shah ot kilo ki marrep ba ki pynmih ha ki katto katne ki nongkhaii ne mahajon.
U bah Titos ula iathuh ba watla kane ka jingot kilo kala sdang na Iewduh hynrei kaba sngewsih ka long ba wat ha kiwei ki iew, kane ka jingshah khnoit bein ki nongrep kala saphriang sha kiwei ki iew kiba hap haka jingkhmih ka KHADC.
“Dang shen ka KHADC kala pynmih iaka hukum ba la khang iaka jingot kilo iaki mar rep jong ki nongrep ha Iewduh bad mynta ka sngi ka District Council kala shim biang iaka rai ban pyntreikam ia kane ka juh ka hukum sha kiwei pat ki iew kiba dang hap haka jingkhmih ka KHADC” la ong u bah Titos.
U bah Titos ula ong “Ka jingot kilo ia ki marrep ha Iewduh Shillong kala duh jait mynta hynrei kane ka jingiai bteng ban ot kilo sha kiwei pat ki iew ka lah ban dei namar ki nongkhaii ne mahajon kim pat tip shaphang kane ka hukum kaba dang treikam mynta kumba 9 sngi eiei namar ia kane ka hukum la pyntip dang ha ka 15 tarik mynta u bnai”.
U bah Titos ula ong ba shen ka district council kan s alum ka jingialang ia baroh ki nongrep, nongkhaii bad ki mahajon ban pynshai sha ki, ba kane ka hukum bala pynmih ka district council haka 15 tarik mynta u bnai, ka treikam ha baroh ki iew kiba hap haka jingpeit ka KHADC.
