Nongpoh, Jymmang 21: U Myntri Rangbah ka jylla uConrad K Sangma, u la pyntip paidbah ba shen ka Sorkar Jylla kan sa lah ban plie paidbah noh ia ka Zoological Park lane ka State Zoo kaba don ha Umtrew, Ri Bhoi District hadien ka jingpynbit pynbiang sa katto katne ki jingtei kiba la pyntikna ban pyndep noh hapoh ki katto katne sngi ban wan.
U Conrad K Sangma u la pynbna ia kane hadien ka jingleit jurip dalade ia ki jingtei ba la dep tei ha katei ka State Zoo kaba la sdang ban tei naduh u snem 2019. Hynrei namar ka jinglynshop ka khlam COVID-19 ka la don ka jingkhanglad ban pyndep marmar ia ki jingtei kaba la mang tyngka ruh kumba 35 klur tam ka jinglut jingsep baroh.
Haba kren bad ki Nongthoh Khubor, u Myntri Rangbah u la pynpaw ba kane ka jingjurip ka long shisha kaba da hun shisha ban iaid sawdong sawkun jong kane ka park kaba la jan dep artad baroh ki jingtei bad ki jingdonkam baroh.
Ula pyntip ba hadien ka jingiaphylliew jingmut bad ki ophisar ka tnad Forest la lah ban pyntikna ban yn sa plie paidbah noh ia kane ka park hapoh ka 15 tarik u Nailar 2023 hashwa ka jingrakhe ia ka Independence Day.
U la iathuh ruh, ba ha kane ka park lane ka Zoo yn wanrah ia shibun ki jait mrad kiban sa wanrah na kylleng kylleng kiban sa ri bad buh ha kane ka zoo ban pynbyrngia ia ki nongwan jngohkai pyrthei, ki khyllung khynnah bad ki rangbah briew.
U iathuh ba nalor ki mrad ha kane ka park yn sa wanrah ruh ia shibun ki jingpynbyngia kiba ai jinghun ia ki paidbah kiban wankai sha kane ka park, da kaba bynrap ruh, ba ka jingtreikam ha kane ka park kan long beit katkum ka juk ba mynta lane professional.
Halor ka lad thungkam thungjam, u Conrad u la ong, ba ia kane ka bynta yn aiti hi ha ka tnad Forest ban thungkam lada donkam briew kiba peit ban khmih ia kane ka park, bad yn sa ailad ruh ia ki khun samla kiba don ia ki sap sengkam sengjam lade ban sengkam ha kane ka park (Local Entrepreneurs).
Ula iathuh ba kum u Myntri Rangbah u dep ruh ban ai jingmut sha ki ophisar ba kin nang pynbit pynbiang shuh shuh ha kane ka park kum ka jingthaw ia ki kynja krem bad kshaid kiban long ki jingpyninam ia ka jingriewspah jong kane ka jylla ha ka liang ka mei mariang ruh.
