Guwahati, Jymmang 20: Ka Sorkar Assam kala aiti ia ka jingtohkit halor ka jingiap ka Sub Inspector Junmoni Rabha sha ka Central Bureau of Investigation, hynne ka sngi saitjain.
Haba kren sha ki lad pathai khubor, u Diector General of Police ka Assam GP Singh ula ong “Ngi la aiti ia ka jingtohkit halor ka aksiden kali ka Sub Inspector Junmoni Rabha sha ka CBI. Kat kum ka jingsngew u paidbah, ngi la rai ban aiti noh ia ka jingtohkit sha ka tnad ba laitluid ka CBI. Ka Heh Pulit jong ngi kala duh iala ka jingim, ta ka daw ngi la rai ba kane ka dei kaba hap tihkit da ka CBI”.
“Ia kane la phah sha ka CBI halor ki artylli ki nongrim. Kaba nyngkong, halor ka jingsngew u paidbah bad kaba ar ka long ba kan lah shiliang shano shano ruh” ong u DGP.
“U Myntri Rangbah Himanta Biswa ula pynpaw ia ka nongim ba u ieng halor ka jingtohkit ia ka jingiap ka Junmoni Rabha. U Myntri Rangbah ula kren halor kiei kiei kiba don ha lyndet ka jingiap bad kular ia ka jingtohkit kaba bniah” ula bynrap.
Ula bynrap ruh ba ka Tnad kan leh da kaba tyngeh ia kino kino ki Pulit kiba donkti ha kane ka kam bymman “Lada don kiba donkti, kin hap bah hi ia ka jingkitkhlieh. Ka Tnad Pulit kan leh tyngeh pyrshah ia ki Ophisar kiba donkti”.
Ha kawei ka liang, hadien ba ka CBI kala shimti ia ka jingtohkit n aka CID, ka Tnad kala pynkynriah kami a u Superintendent of Police ka Nagaon bad Lakhimpur.
