Shillong, Jymmang 18: Ka Rangdajied United FC kala pynliem haduh 6-0 ia ka Sein Pynbhalang ha ka jingialehkai Football ha ka Group B jongka Meghalaya State League 2023 kaba la long hynne ka sngi Palei ha Kiang Nangbah Stadium,Jowai.
Ka Rangdajied kaba la sngewthuh ba kan don ka jingiaknieh ban long ka lahduh haka Group B kumta kala iakhun tyngeh ban ioh thep bun kol hynrei kala pynleh noh ei ruh ia ki 2 tylli ki Penalty ha kaba kam shym la lah ban thep shapoh kol.
Ha kane ka jingiakhun u Tremiki Lamurong jongka Rangdajied ula ioh iaka Hat-Trick da kaba thep iaka kol ha ka minit kaba 63, 76 bad 77, katba u Banshanbha Khongsdam ula thep ia ka kol ha ka minit kaba 19 bad 75 bad u Wanlamsuk Nongkhlaw ula ioh thep ia ka kol ha ka 90’+2 minit.
Da kane ka jingjop, ka Rangdajied kala lah ban ialehkai bha ban ia ka Ladthadlaboh SC, kaba la pynliem iaka Sein Pynbhalang da 5-0 ha ka 13 tarik u Jymmang.
Haba phai ha ka jingiakhun ha ka Group A kaba la long ha Madan MFA Shillong, ka Jyntru FC kala iakhaid bad ka Umrit SC da 1-1 katba ha ka Group D kaba la long ha Chandmari Ground Tura, ka Selsella Sports Association kala pynrem da 3-1 kol ia ka Warima Youth Club.
Ka Warima kala beh nadien iaka Selsella, haba u Benjamin Marak ula ioh thep ia ka kol ha ka minit kaba 13, hynrei ka Warima kala lah ban pyniakhaid da ka bioh thep ia ka kol kaba nyngkong ha ka minit kaba 50 lyngba u Charlie R Marak.
Hadien kane la bteng ia ka jingthep kol da u Walseng Sangma ha ka minit kaba 64 bad 66.
Ha ka jing iakhun ha Shillong, u rangialehkai ka Jyntru u Badaminot Nongphlang ula ioh thep ia kol ha ka minit kaba 16 bad hadien kane ka Umrit kala ioh ban pyniakhiad haka minit kaba 63 ha kaba u Donald Nongtri ula ioh ban thep ia ka kol.
Ka jingiakhun lashai ka sngi ha ka Group A ha Shillong kan long hapdeng ka Mawlai SC pyrshah ia ka Langsning FC ha ka por 3 baje mynsngi.
Ha ka Group B, ha Jowai ka jingiakhun kan long hapdeng ka Niaw Wasa United pyrshah iaka Mulait United ha ka por 2:30 mynsngi.
Ha ka Group C ha Mawkyrwat, ka Riangdo YSCA kan iakhun pyrshah ia ka Seven United ha ka por 3 baje mynsngi, katba ha ka Group D ha Tura, ka jingiakhun kan long hapdeng ka Wasa FC pyrshah ia ka Atong Matgrik FC ha ka por 3 baje mynsngi.
