Shillong, Jymmang 18 : Ka Sorkar Jylla kala mynjur ban siew pynkhuid noh ia ka arrear ba pynsah haduh phra bnai jong ki Nonghikai SSA kaba kot sha ka T. 47 klur bad ia kane yn siew da ka installment kaban sdang naduh u bnai Jylliew mynta u snem.
Kane kala mih hadien ka mukotduma bala mudui da ka Meghalaya Sarva Shiksha Abhiyan School Association (MSSASA) hapoh ka Iingkashari Meghalaya High Court.
Ha ka hukum ba pynmih hynnin ka sngi Balang, ka Iingkashari kala pynwai noh ia ka mukotduma hadien ba ka Sorkar Jylla kala pyntip ba kala dep pynkhreh ia ka formula ha kaban pyllait noh ia ki arrear tulop ba dang sahteng jong ki nonghikai SSA.
“Ngi kmen ba pyntip sha baroh ki Nonghikai SSA ba ka Sorkar Jylla kala mynjur ban siew pynkhuid noh ia ki arrear tulop ba sah (ba kot T. 47 klur) na ka bynta phra bnai-kata naduh ka 1tarik Naitung 2016 haduh 28 Rymphang 2017” ong u President ka MSSASA Bah Aristotle C Rymbai ha ka kyrwoh ba pyllait hynne ka sngi Palei.
Ula pyntip ba u Commissioner & Secretary ba khmih ia ka Tnad Eduction Dr BDR Tiwari ha ka shithi ba 4 tarik Iaiong, 2023, ula pyntip ba ka tnad Education kala pynkhreh ia ka formula ban pyllait ia ki arrear tulop ba sahteng jong ki nonghikai SSA.
“Ia ka installment ba nyngkong yn sa pyllait ha u Jylliew 2023 (ba (1191.615 lak, installment ba-ar ha u Nohprah 2023 (ba T. 1191.615 lak), installment ba lai ha u Jylliew 2024 (ba T. 1191.615 lak) bad installment ba 4 ha u Nohprah 2024 (ba T. 1191.615 lak)” ong u Bah Rymbai.
