Shillong, Jymmang 18 : Ka Sorkar Jylla kala rai ban pynkynriah noh ia Shillong District Jail sha New Shillong Township.
Ia kane la pyntip da u Symbud Myntri Rangbah ka Jylla ba khmih ia ka Tnad Prison Bah Sniawbhalang Dhar, uba la hiar jurip hynne ka step sngi Palei ia ka jinglong jingman ka Shillong District Jail.
Haba iakren bad ki Nongthoh khubor, u Bah Sniawbhalang ula pyntip ba ka Sorkar kala dep shim rai ban pynkynriah ia ka Shillong District Jail sha NST haba ong “Ka por kala dei ban pynkynriah noh ia kine kiei kiei (jingtei ka Sorkar) sha khapsor”.
Haba kylli halor ka jingiaid ka kam ba iadei bad ka jingtei ia ka Central Jail, u Symbud Myntri Rangbah ula ong “Kane ka dei ka kam ba iaid mynta. Ngi la rai ban kynriah ia ka Shillong District Jail”.
Lah ban kdew hangne ba Ka Sorkar Jylla dang shen, kala rai ban tei noh iala ka jong ka Central Jail ha New Shillong Township, ka ban pyllait ia ki District Jail na ka jingthngian ia ki koidi kumba thep phan.
Kumba long mynta, jan baroh ki District Jail ka Jylla ki don hapdeng ka jingeh kaba khraw namar ka jingkhapngiah ha ka jingdon ki koidi.
U Myntri u pyntip ba ka Tnad Prison kala ioh ia ka jaka kaba heh kumba 25 acre ha New Shillong Township na ka Tnad Urban Affairs bad mynta ka Tnad ka ap ia ka jingaiti ia ka jaka ban sdang tei noh ia kane ka phatok ba thymmai.
“Hadien ba ngi la ioh ia ka jaka, ngin sa tei ia ka phatok ba thymmai bad ngin sa sdang ia ka jingpynkynriah ia ki koidi na ka Shillong District Jail” ula ong haba pyntip ba kane ka phatok ba thymmai kan dei kaba lah ban set haduh 1000 ngut ki koidi.
Ha kane ka sngi, u Bah Sniawbhalang uba khmih ruh ia ka Tnad Transport ula leit jurip ia ka jingtei jong ka Shopping Complex bad ka jaka pynieng kali ha ka jaka jong ka MTC ba don ha Khyndailad.
“Nga kmen ban iohi ba ki jingtei kila iaid shaid shaid” ula ong.
Ia u Symbud Myntri Rangbah la synran lang da u MLA ka Jowai u bah Wailadmiki Shylla, u CEO ka Municipal, ki Kontraktor lem bad kiwei kiwei.
