Agartala, Jymmang 18 : Ka TIPRA Motha kaba don ha Liang Pyrshah, ha ka sngi Balang kala kyntu ia u Myntri Rangbah ka Jylla Manik Saha ba un tuklar lem ban pynkohnguh ia ka Central bad State Education Board ba kin set jingkylli ia ka sobjek Kokborok da ki dak Roman bad Bengali.
Haba kynthoh hapoh ka Twitter, u President ka TIPRA Motha Pradyot Kishore Manikya Debbarma ula ong “Nga la ai jing mut ia ki bor Sorkar ka TTAADC ba kin leit sha High Court halor ki dak thoh hapoh ka CBSE. Kum ka imlang sahlang, ngim lah ban pdiang ia ka jingpynjari ia ka ktien ka thylliej pyrshah ia ka mon jong ngi. Ngi donkam ban iatylli lang halor kane ka kam”.
U Nongialam ka Liang Pyrshah Animesh Debbarma, ha ka shithi sha u Myntri Rangbah Manik Saha, ula kyrpad ia ka Sorkar Jylla ba kan tuklar mardor ia kane ka kam.
“Ha u snem 2019-2020 bad 2021-2022, ka Directorate of Higher Education, ka Sorkar Tripura, kala pynlong ia ka survey ban wad jingtip ia ka jingmon ia ka dak thoh haba thoh ia ka ktien Kokborok da ki samla pule. Kum ka jingpyntip sha phi, ha u snem 2019-2020, napdeng ki 6649 ngut ki samla kiba jied ia ka ktien Kokborok, 6643 ngut kila jied ia ka dak thok Roman (99.9 %) bad 6 ngut kila jied ia ka dak Bengali (0.09%). Ha u snem 2021-2022, na ki 9147 ngut ki samla ba shim ia ka sobjek Kokborok, 9143 kila jied ia ka dak Roman (99.5%) bad 4 ngut kila jied ia ka dak Bengali (0.04%)” ong ka shithi.
U Debbarma ula ong ba khlem da khein ia ki arngut samla pule ba kren Bengali, jan baroh ki 330 ngut ki Post Graduate ha ka ktien Kokborok kila thoh ia ka eksam da ki dak thoh Roman.
Ula bynrap ba naduh ba pynkha ia ka Tnad Kokborok ha Tripura University ha u snem 2015, ki jingset jingkylli na ka bynta ka Entrance Exam jong ka MA bad Semester Exam lah leh da baroh artylli ki dak thok (Roman bad Bengali).
U Debbarma ula ong ruh ba ka Tripura Public Service Commission kala pynlong ia ka ekam thungkam Assistant Professor ka Kokborok ha u snem bala lah da ki dak thoh Roman.
