Shillong, May 16: Ka Khliehmawlieh Youth Club kala sdang iaka jingiaid lynti ka jongka haka jingiakhun iaka Meghalaya State League 2023 da kaba jop kput ha ka Group D bad kane ka kynhun kala pynrem ia ka Atong Matgrik FC da 7-1 kol ha ka jingialehkai kaba la long hynne ka sngi Baar ha Chandmari Ground, Tura.
Nalor kane, ka Rangdajied United FC kala iakhiad bad ka Ladthadlaboh SC da kaba ia thep kol mar 1 kol ha ka jingialehkai kaba la long ha Kiang Nangbah Stadium, Jowai ha ka Group B, katba ha ka Group A kaba la long ha madan MFA, Shillong ka Langsning FC kala pynliem iaka Umkseh SC da 3-1 kol.
Ki rangialehkai jong ka Khliehmawlieh kiba la thep ia ka kol ki kynthup ia u Rodyson Dkhar (14 minit), u Sharan Sing Nonglang (20 minit) bad ha ka minit kaba 36 u Rakchuwell Marak ula ioh thep shi kol na ka bynta ka Atong Matgrik bad ha ka kylla step ka jingiakhun kala kut da 2-1.
Ha ka kylla miet, ka jingiakhun kala kylla kynsan haba ki rangialehkai ka Khliehmawlieh kila ioh ban thep sa 5 kol, ia kaba la sdang thep shwa da u Istarbon Marngar (69 minit), Lenny Kravity Lyngdoh (71 minit), Dadap Marwein (73 minit), Kynjai Marthong (83 minit) bad u Rishotbor Lyngdoh (90’+3 minit).
Ha kawei pat ka jingiakhun, ka Rangdajied kala ioh ban thep ia ka kol kaba la shut najngai da u Knerktilang Buam ha ka minit kaba 12 hynrei kane ka jingtam ka Rangdajied kala neh tang 20 minit, haba u rangialehkai ka Ladthadlaboh SC u Ebanskhem Nongtdu ula ioh ban thep ia ka kol ha ka minit kaba 31 bad kane ka jingiakhun kala kut noh ha ka jingiakhaid.
Ha ka jingialehkai kaba la long ha Shillong, u Roikhihbha Nongtdu jongka Langsning ula ioh ban thep ia ka kol ha ka minit kaba 6, mar ia sdang ka jingiakhun pyrshah iaka Umkseh.
Hadien kane u Milancy Khongstia ula pynbuh ia ka ball ia u Nongtdu bad ula ioh ban thep ia ka kol kaba ar ha ka minit kaba 13. Ka Umkseh kala iakhun dohiap bad kala ioh ban thep iaka kol ha ka minit kaba 54 lyngba u Kyrshan Lhongsit uba la shut iaka Freekick.
Ka Langsning, tang hadien 3 minit ba kala shah thep ia ka kol, kala ioh ban thep ia ka kol kaba 3 lyngba u Arnesius Marwein ha ka minit kaba 57, kaba la pynlong syndon iaka Langsningban jop da 3-1 ia ka Umkseh.
Ha ka sngi Balang, kan don tang kawei ka jingiakhun kaban long hapdeng ka Rymbai Iawpynsing SC pyrshah iaka Niaw Wasa United jong ka Group-B ha ka por 2:30 mynsngi ha Kiang Nangbah Stadium, Jowai.
