Shillong, Jymmang 16 : Ka Sorkar Jylla kala pyntip ia ka jingwan lynshop jong ka khlam sniang ne ka African Swine Flu ha Eastern West Khasi Hills bad pynjari ia ka kynhun 144 CrPC ba khang ban iakit iarong ia ki sniang na kane ka District ban khaii sha kiwei pat ki jaka.
Ka Tnad Animal Husbandry & Veterinary kala pynthikna ba kane ka khlam sniang kala wan lynshop ha ka farm ri sniang jong ka Sorkar kaba don ha Nongkasen, Eastern West Khasi Hills.
U District Magistrate ka District ha ka jingpynbna ula ong ba khnang ban iada,tehlakam bad rat dyngkhong ia ka khlam sniang bad ban khanglad ia ka jingsaphriang jong kane ka jingpang shabar ka District, la pynmih ia ki jingpyrrkhing ha ka radius ba 10 Km na kane ka farm sniang kaba la tip ruh kum ka infected zone ne ka jaka ba iabit ia ka khlam.
Kat kum ka hukum u District Magistrate, ka jingpyrrkhing ka kynthup ia ka jingiakit iarong ia ki sniang, ki dohsning, ki jingbam, ki tiar bad ki dawai sniang na kine ki jaka ba shah ktah sha ki jaka bym pat don satia kane ka khlam.
Kane ka kyndon jingiada ka kynthip ba ki trai ba don jaka ri sniang ki dei ban lehkhuid iala ki sem sniang bad ban khang ia ka jingwan rung ki briew sha ki jaka ri sniang jong ki nalor ban set beit ia ki sniang hala ki jong ki sem.
